İQTİSADİYYAT
AKSİZ MARKASI OLMAYAN TÜTÜN MƏMULATININ SATIŞI QANUNA ZİDDİR
Vergilər Nazirliyi və gömrük orqanları əməkdaşlarının ticarət obyektlərində, küçə və meydanlarda qanunsuz siqaret satışına qarşı apardığı ardıcıl nəzarət tədbirlərinə baxmayaraq, ölkəyə gömrük nəzarətindən kənar gətirilən tütün məmulatının, o cümlədən belə məhsulların aksiz markası ilə markalanmadan satışı halları hələ də davam etməkdədir. Bəzən belə məhsulların arasında istehsal mənşəyi və ya istifadə üçün yararlılığı şübhə doğuran siqaretlərə də rast gəlinir ki, bu da istehlakçının sağlamlığına təhlükə törədir. Eyni zamanda, tütün məmulatının nəzarətdənkənar satışı vergidən yayınmalara gətirib çıxarır.
Vergilər Nazirliyinin mətbuat xidməti bildirir ki, belə halların qarşısının alınması, həmçinin “Alkoqollu içkilər, etil (yeyinti) spirti və tütün məmulatı istehsalının, saxlanmasının, idxalının və satışının tənzimlənməsi haqqında” Azərbaycan Respublikası Prezidentinin 20 dekabr 1996-cı il tarixli Fərmanının və Nazirlər Kabinetinin 04 mart 1999-cu il tarixli 33 nömrəli Qərarının icrasını təmin etmək məqsədi ilə Vergilər Nazirliyi son zamanlar bir sıra ardıcıl tədbirlər həyata keçirmişdir.
Təkcə bu ilin 8 ayında ölkə üzrə keçirilən reyd və yoxlamalar zamanı ticarət obyektlərində dəyəri 366500,7 min manat məbləğində 311095 qutu aksiz markası olmayan tütün məmulatı qeydə alınmişdir. Müvafiq icra hakimiyyəti və məhkəmə orqanlarının qərarlarına əsasən, qanunazidd hərəkətlərə yol vermiş cavabdeh şəxslərə 119590,0 min manat məbləğində inzibati cərimə kəsilmiş, aksiz markası olmayan 63342 qutu tütün məmulatı müsadirə edilmişdir. Bununla yanaşı, Vergilər Nazirliyi bu ilin fevral və may aylarında Bakının Sabunçu rayonu ərazisində Balaxanı məişət tullantıları qəbulu məntəqəsində istifadə üçün yararsız 1 milyon 368 min 220 qutu tütün məmulatının məhv olunmasını təşkil etmişdir.
Son vaxtlar Bakı şəhəri ərazisində tütün məmulatının qanunsuz satışı əsasən metro stansiyalarında və ya yeraltı keçidlərdə müşahidə olunur. Operativ nəzarət idarəsinin ötən həftənin sonunda keçirdiyi reydlər zamanı metronun “Elmlər Akademiyası” stansiyası və ətrafındakı xırda ticarət obyektlərindən 30 qutu, “Əzizbəyov” stansiyası və ətrafındakı obyektlərdən isə 200 qutu aksizsiz siqaretlər aşkar edilmişdir. Lakin vergi orqanlarının həyata keçirdiyi profilaktik tədbirlər nəticəsində artıq şəhərin bir çox yerlərində qanunsuz siqaret ticarətinə son qoyulmuşdur.
Vergilər Nazirliyinin mətbuat xidməti bir daha sahibkarların nəzərinə çatdırır ki, aksiz markası olmayan tütün məmulatının satılması və ya saxlanması qanuna ziddir. İnzibati Xətalar Məcəlləsinin 229-cu maddəsinə əsasən, aksiz markasız satılan məhsullara görə həmin mallar müsadirə edilməklə və ya edilməməklə cavabdeh şəxslər cərimə olunur.
Vergilər Nazirliyi sahibkarlıq fəaliyyəti ilə məşğul olan hüquqi və fiziki şəxsləri tütün məmulatı satışının tənzimlənməsi işində yardımçı olmağa çağırır.
Vergilər Nazirliyinin Mətbuat xidməti