Aktauda 27 Sentyabr – Anım Günü ilə bağlı tədbir keçirilib
Astana, 26 sentyabr, AZƏRTAC
Azərbaycan Respublikasının Aktau şəhərindəki Baş Konsulluğunda 27 Sentyabr – Anım Gününün beşinci ildönümü ilə bağlı tədbir keçirilib.
AZƏRTAC xəbər verir ki, tədbirdə konsulluğun əməkdaşları, Türkiyə, Özbəkistan və Türkmənistanın Aktaudakı baş konsulları və əməkdaşları, Manqistau vilayətinin Xalq Nəzarəti Şurasının sədri, Ş.Yessenov adına Xəzər Texnologiya və Mühəndislik Universitetinin müəllim və tələbələri, Azərbaycan diasporunun üzvləri iştirak etdilər.
İştirakçılar əvvəlcə Vətən müharibəsini əks etdirən fotosərgi və kitablarla tanış oldular.
Tədbirin əvvəlində Vətən müharibəsi şəhidlərinin xatirəsi bir dəqiqəlik sükutla yad edilib, sonra isə Baş konsul Ayxan Süleymanlı, Azərbaycan Respublikasının TÜRKSOY təşkilatındakı nümayəndəsi Elçin Qafarlı, “Dostluq” Etnomədəni Birliyinin sədri Şəmsəddin Hüseynov və Vətən müharibəsi iştirakçısı, Ş.Yessenov adına Universitetin tələbəsi Vüsal Məhərrəmli çıxış ediblər.
A.Süleymanlı tədbirdə 27 sentyabr 2020-ci ildə Ermənistan silahlı qüvvələrinin törətdikləri təxribatdan, bu təxribatın qarşısını almaq üçün Ali Baş Komandan İlham Əliyevin rəhbərliyi altında Ermənistanla 44 gün davam edən müharibədən danışıb. O, Vətən müharibəsindən sonra regionda yeni reallıqlar formalaşdığını, Azərbaycanın bu gün Cənubi Qafqazın aparıcı gücü olaraq sülhün və təhlükəsizliyin təminatçısına çevrildiyini diqqətə çatdırıb.
Qarabağ və Şərqi Zəngəzurda aparılan quruculuq işləri barədə məlumat verdikdən sonra Baş konsul bildirib ki, Vətən müharibəsi başa çatdıqdan sonra Prezident İlham Əliyevin imzaladığı Sərəncama əsasən ölkəmizin ərazi bütövlüyü uğrunda canlarını fəda etmiş bütün şəhidlərə ehtiram əlaməti olaraq, hər il sentyabrın 27-si Azərbaycanda Anım Günü kimi qeyd olunur.
Azərbaycan Respublikasının TÜRKSOY təşkilatındakı nümayəndəsi E.Qafarlı çıxışında təşkilatın qazandığımız zəfərdən sonra verdiyi dəstək bəyanatını xatırladaraq bu qələbənin bütün türk dünyasının qələbəsi olduğunu vurğulayıb.
“Dostluq” Etnomədəni Birliyinin sədri Şəmsəddin Hüseynov çıxışında ordumuzun rəşadətindən, xalqımızın müharibə zamanı göstərdiyi birlikdən danışıb və iştirakçılara Vətən müharibəsi iştirakçısı V.Məhərrəmlini təqdim edib.
Vətən müharibəsi iştirakçısı Vüsal Məhərrəmli isə çıxışında keçdiyi döyüş yolundan danışaraq iştirakçılara məlumat verib.
Çıxışlar zamanı böyük ekranda Baş Konsulluq tərəfindən hazırlanmış slayd-şou nümayiş etdirilib, tədbirin sonunda isə “Şuşa, sən azadsan” sənədli filmi göstərilib və şəhidlərin ruhuna ehsan süfrəsi açılıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
