Buxarest, 14 noyabr, AZƏRTAC

COP29 konfransından əsas gözləntilər ölkələrin iqlimlə bağlı öhdəliklərinin artırılmasıdır. Əsas məqsəd ölkələrin istixana qazlarının azaldılması ilə bağlı hədəflərini daha ciddi şəkildə yerinə yetirmələri və Paris Sazişinin temperatur limitinə uyğunlaşdırmalarıdır. Eyni zamanda, inkişaf etməkdə olan ölkələrə iqlim dəyişikliyinin təsirləri ilə mübarizədə dəstək verilməlidir. Həmçinin bərpaolunan enerji mənbələrinə keçidin sürətləndirilməsi və fosil yanacaqlardan tədricən imtina edilməsi əsas məqsədlər sırasındadır.

Bu fikirləri Rumıniya Ailə, Gənclər və Şansların Bərabərliyi Nazirliyinin Ailə və demoqrafiya siyasəti üzrə departamentinin baş direktoru Aleksandra Dobre AZƏRTAC-ın xüsusi müxbirinə müsahibəsində söyləyib.

Aleksandra Dobre COP29 konfransında noyabrın 18-dən etibarən iştirak edəcək.

Müsahibimiz regionda enerji təhlükəsizliyi və gələcəkdə yaşıl siyasətə dair vacib məsələlərə toxunub. O, COP 29-da təkcə qlobal iqlim siyasəti haqqında deyil, həmçinin gənclər və demoqrafik siyasət baxımından uzunmüddətli davamlı inkişafın təmin olunmasından bəhs edib.

Rumıniya Ailə, Gənclər və Şansların Bərabərliyi Nazirliyinin departament rəhbəri iki ölkə arasında enerji təhlükəsizliyi sahəsindəki əməkdaşlığın da Avropanın gələcək enerji strategiyaları üçün böyük əhəmiyyət kəsb etdiyini bildirib. Bu məsələlərin, gələcəkdəki ekoloji və iqtisadi irəliləyişlərə böyük təsir göstərəcəyini diqqətə çatdırıb.

Aleksandra Dobre Rumıniya və Azərbaycanın Avropanın enerji təhlükəsizliyinə mühüm töhfə verdiklərini qeyd edib: “Azərbaycan Avropa üçün vacib qaz və neft təchizatçısıdır, Rumıniya isə Cənub-Şərqi Avropada strateji mövqeyə sahibdir. Bu əməkdaşlıq Avropanın enerji mənbələrini diversifikasiya edərək digər regionlardan asılılığı azaldır və Avropa İttifaqının enerji dayanıqlılığını artırır”.

Müsahibimiz diqqətə çatdırıb ki, iki ölkənin birgə fəaliyyət göstərdiyi “Cənubi Qaz Dəhlizi” layihəsi Avropaya Xəzər regionundan qaz nəqlini təmin edərək enerji təhlükəsizliyinin uzunmüddətli davamlılığını dəstəkləyir.

Baş direktor qeyd edib ki, COP29 konfransında iştirak edəcəyi panellərdə gənclər, uşaqlar və demoqrafik siyasətlər barədə ciddi müzakirələr olacaq: “Gənc nəsil uzunmüddətli təsirlərə qarşı ən həssas qrupdur. Bu baxımdan onların sağlamlığı, təhsili və rifahı üçün qorunma tədbirlərinin müzakirə edilməsi vacibdir. Eyni zamanda, iqlim dəyişikliyinə qarşı mübarizədə gənclərin fəal iştirakı prioritet məsələlərdən biridir. Bununla yanaşı, yaşıl təhsil və gənclərin ekoloji həssaslıqlarını artırmaq üçün məktəblərdə təhsil proqramlarının genişləndirilməsi vacibdir”.

Aleksandra Dobre bildirib ki, ən böyük məqsəd karbon tullantılarının az olduğu neytral bir iqtisadiyyat qurmaqdır. Onun sözlərinə görə, karbon emissiyalarını azaltmaq, bərpaolunan enerjiyə keçid və ekosistemlərin qorunması kimi sahələr əsas diqqət mərkəzində olacaq. Eyni zamanda, yaşıl innovasiyalara sərmayə qoymaq prioritet olacaq.

Baş direktor Bakı şəhərinin böyük beynəlxalq tədbirləri təşkil etmək üçün yüksək hazırlıq səviyyəsində olduğunu vurğulayıb: “Bakı müasir infrastruktur və yüksəkkeyfiyyətli xidmətlər təklif edir. Bu şəhər beynəlxalq tədbirlərin keçirilməsi üçün ən uyğun yerdir, təhlükəsizlik və nəqliyyat məsələlərində yüksək standartlara malikdir. Bakı COP29 kimi böyük tədbirlərin keçirilməsi ilə qlobal əməkdaşlıq və iqlim məsələlərində önəmli bir mərkəzə çevrilir”.

İqbal Hacıyev

AZƏRTAC-ın xüsusi müxbiri

Buxarest