Aleksey Naumov : Azərbaycan incəsənətini Latviyada görmək maraqlı olardı
A.Naumov müxtəlif ölkələrdə yüzdən çox fərdi və kollektiv sərginin müəllifidir. O, bir sıra nüfuzlu mükafatların laureatıdır, İtaliya Respublikasının “Şərəf” ordeni ilə təltif olunub. Bu ordeni İtaliya Prezidenti Karlo Çampli özü ona təqdim edib.
A.Naumovun sözlərinə görə, o, əsərlərini realist ekspressionizm üslubunda işləyir, şəkil çəkmək isə onun üçün həyati zərurətdir.
Latviyalı rəssam xatırlayır ki, üç il əvvəl Bakıda “Qız qalası” qalereyasında dostum, qalereyanın rəhbəri Emin Məmmədovun köməyi ilə sərgim təşkil edilmişdi. Bakının bütün bomondu həmin sərgiyə toplaşmışdı. Sərgi çox uğurlu keçdi. M.Lomonosov adına Moskva Dövlət Universitetinin Bakı filialının rektoru, professor Nərgiz Paşayeva da qonaqların arasında idi.
A.Naumovun əsərlərində təkcə Fransanın cənubu deyil, həm də Venesiya, onun sevdiyi Burano təsvir olunub. Rəssam hər il Venesiyanın müxtəlif rəngdə evləri ilə məşhur olan bu ada məhəlləsində peyzajlar çəkir.
A.Naumov deyir: “Bakıda tez-tez oluram. Ötən il Latviya Prezidenti Andris Berzinşi müşayiət edən nümayəndə heyətinin tərkibində idim. Həmin səfər çərçivəsində latviyalı rəssamların işlərindən ibarət “Müasir Latviya incəsənəti” adlı sərgi təşkil edilmişdi. Nümayiş olunan işlər arasında mənim də əsərlərim vardı. Vernisajdan bir gün əvvəl mən “Four Seasons” otelinin Xəzərin qeyri-adi mənzərəsi görünən balkonundan bir şəkil çəkdim. Həmin rəsm də Bakı sərgisində nümayiş etdirildi. Azərbaycan sənətkarlarının ötən əsrin 60-70-ci illərinin təsviri sənət yaradıcılığı sərgisini görmək mənə nəsib oldu. Zənnimcə, əsərlərdə fransız üslubu üstünlük təşkil edirdi”.
Latviyalı rəssam təsadüfən düşdüyü Azərbaycan bazarının bənzərsiz koloritini də xatırlayır. A.Naumov qeyd edir ki, istənilən Şərq ölkəsində bazara baş çəkmək xalqın məişəti və müasir nəsil üçün səylə qorunub saxlanan adətləri ilə tanış olmaq imkanı yaradır.
A.Naumov bildirib ki, Latviyanın və Azərbaycanın rəssamlıq akademiyaları arasında mədəni əməkdaşlıq haqqında müqavilə imzalanıb. Latviyalı rəssam deyir: “Azərbaycan incəsənətini Latviyada görmək maraqlı olardı. Bu, ölkələrimiz arasında mədəniyyət əlaqələrinin genişlənməsinə kömək edərdi. Həmkarım, Azərbaycan Rəssamlıq Akademiyasının rektoru, Xalq Rəssamı Ömər Eldarovla gələn il Latviyada Azərbaycan rəssamlarının sərgisinin keçirilməsini planlaşdırırıq. Azərbaycan xalçaları sərgisinin təşkili ideyası da gözdən keçirilir”.
Latviyalı rəssamın sözlərinə görə, Azərbaycan Rəssamlıq Akademiyası ilə imzalanan müqavilədə nəzərdə tutulan proqramların həyata keçirilməsi, heç şübhəsiz ki, ölkələrimiz arasında sıx mənəvi və mədəni əlaqələri təsdiq edən əsil bayrama çevriləcək.
Nigar Cəfərli
AZƏRTAC-ın xüsusi müxbiri
Riqa
Bölmənin digər xəbərləri
