İQTİSADİYYAT
ALMANİYA-AZƏRBAYCAN FONDUNUN YENİ AGENT-BANKLARI GƏLƏN İLDƏN KREDİT VERMƏYƏ BAŞLAYACAQLAR
Yaxın günlərdə Almaniya-Azərbaycan Fondunun (AAF) yeni agent-banklarının müəyyənləşdirilməsi üzrə tenderin nəticələrinin elan olunacağı gözlənilir. Bu banklar kiçik və orta sahibkarlığın dəstəklənməsi üçün kreditlər ayıracaqdır. Mütəxəssislərin fikrincə, Sahibkarlığa Kömək Milli Fondunun xətti ilə kreditləşdirmə layihələrində iştirak edən banklar da müsabiqənin qalibi ola bilərlər.
Hazırda AAF-ın kredit layihələri çərçivəsində özəl sahibkarlıq üçün 2,6 milyon avro ayrılmışdır. Ekspertlər hesab edirlər ki, kredit xətlərinin sürətlə artması kreditləşdirmə şərtlərinin yaxşılaşmasının, o cümlədən sahibkarlar üçün faiz dərəcələrinin 2,3 faizə endirilməsinin, habelə bir kreditin maksimum məbləğının artırılmasının və ərizələrə baxılma prosedurunun sadələşdirilməsinin nəticəsidir.
Ötən ay AAF-ın agent-bankları 365 min avro məbləğində 21 kredit vermişdir. Bu, AAF fəaliyyətə başlayandan bəri ən yüksək göstəricidir.