ALMANİYALI MƏKTƏBLİLƏR AZƏRBAYCAN MƏKTƏBİNƏ “BRAYL” ÇAP APARATI HƏDİYYƏ EDƏCƏKLƏR
Bakı, 24 iyul (AZƏRTAC). İyulun 23-də “Vahid, Bölünməz və Demokratik Azərbaycan Uğrunda Birlik” cəmiyyətinin təşəbbüsü ilə Almaniyanın Valkenburq bələdiyyəsinin Heiliq Hart Sibbe orta məktəbində tədbir keçirilmişdir.
Cəmiyyətin rəhbəri İradə Uluxanlı AZƏRTAC-a bildirmişdir ki, tədbirdə Heiliq Hart Sibbe məktəblilərinin təşkil etdikləri aksiyalarin nəticələri müzakirə olunmuş, Azərbaycan Gözdən Əlillər Cəmiyyətinin məktəbliləri üçün alınmış “Brayl” çap aparatı nümayiş etdirilmişdir. 4200 avro dəyərində çap aparati İsveçin “Worldvision” firması tərəfindən istehsal edilmişdir.
Heiliq Hart Sibbe məktəblilərinin xeyriyyəçilik addımı tədbirdə iştirak edən “Heuvelland actueel”, “Dagblad de Limburger” ve “Limburgs Dagblad” qəzetlərinin nümayəndələri tərəfindən alqışlanmış, həmin qəzetlərin səhifələrində bu barədə geniş materiallar dərc olunmuşdur.
Sözügedən orta məktəbin 10 şagirdi iyulun 26-da Azərbaycana gələcəkdir. Səfərin məqsədi ölkəmizin tarixi, mədəniyyəti ilə yaxından taniş olmaqdır.
Qonaqlar çap aparatını iyulun 27-də Azərbaycan Gözdən Əlillər Cəmiyyətinin nəzdindəki məktəbə təqdim edəcəklər.
Bölmənin digər xəbərləri
