Almaniyanın kibertəhlükəsizlik idarəsi internetə çıxışı olanlara xəbərdarlıq edib
Berlin, 11 noyabr, AZƏRTAC
Almaniyada bir çox server, veb-tətbiq və onlayn xidmətlər hələ də kifayət qədər qorunmur, bu da hücum edənlərin şəbəkələrə daxil olmalarına və məlumat oğurluğuna imkan yaradır. 2024-cü ilin iyulundan 2025-ci ilin iyununadək gündəlik yeni aşkar edilmiş zəifliklərin sayı 24 faiz artıb.
AZƏRTAC xəbər verir ki, bu barədə Almaniyanın daxili işlər naziri Aleksander Dobrindt və Federal İnformasiya Texnologiyaları Təhlükəsizlik İdarəsinin (BSI) sədri Klaudia Plattnerin birgə keçirdikləri brifinqdə məlumat verilib.
A.Dobrindt rəqəmsal təhlükəsizliyin dövlət suverenliyinin əsas məsələsi olduğunu qeyd edərək, “Cyberdome” (Kiber-qübbə) vasitəsilə şəbəkə hücumlarına qarşı güclü müdafiə qalxanının yaradıldığını bildirib.
BSI sədri Klaudia Plattner deyib ki, internetə çıxışı olan hər bir institut və ya şəxs potensial olaraq hədəfdədir. Hücum edənlər ən həssas nöqtələri seçərək şəbəkələrə daxil olurlar. Fəal müdafiə tədbirləri görənlər riskləri minimuma endirə bilərlər.
Hesabata əsasən, maliyyə motivli kiberhücumlar ötən ilə nisbətən 9 faiz azalıb. Bunun səbəbi beynəlxalq istintaq əməliyyatlarının uğurlu nəticələridir.
Almaniya Daxili İşlər Nazirliyinin (BMI) kibertəhlükəsizlik dayanıqlılığını artırmaq üçün quraşdırmağı planlaşdırdığı “Cyberdome” sistemi hücumların aşkarlanması, təhlili və cavab tədbirlərinin qismən avtomatlaşdırılmış şəkildə həyata keçirilməsini təmin etməyə imkan verəcək.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
