Almaniyanın Reynland-Pfalts əyalətində bir evdə üç nəfərin meyiti aşkarlanıb
Berlin, 6 aprel, AZƏRTAC
Almaniyanın Reynland-Pfalts əyalətinin Vestervald bölgəsindəki bir evdə üç meyit aşkarlanıb.
AZƏRTAC “Bild” qəzetinə istinadla xəbər verir ki, polis həmin şəxslərin qətlə yetirildiyini, cinayəti törətməkdə şübhəli bilinən bir nəfərin axtarıldığını açıqlayıb.
Əhali üçün hər hansı təhlükənin olmamasına baxmayaraq, hadisənin baş verdiyi Vaytefeld icmasının və ətraf ərazilərin sakinlərinə evdə qalmaları, bayırda gəzməmələri və yol kənarlarında tanımadıqları şəxsləri avtomobilə mindirməmələri barədə xəbərdarlıq edilib.
Cinayətin təfərrüatları və səbəbləri, həmçinin ölənlərin şəxsiyyətləri araşdırılır. Hadisə yerinə xüsusi təyinatlılar cəlb olunub. Təxminən 2200 nəfər əhalisi olan icmanın ərazisinə girmək və ya oradan çıxmaq istəyən avtomobillər yoxlanılır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
