ALTERNATİV NOBEL MÜKAFATLARININ LAUREATLARI MƏLUMDUR

30.09.2006 [14:59]
Çap et
A⁺ A^-

AZƏRTAC “Alman dalğası” radiostansiyasına istinadla xəbər verir ki, bu il alternativ Nobel mükafatları qadınların hüquqları uğrunda hərəkatın fəalı olan hind qadına, Pentaqonun sabiq əməkdaşına, Kolumbiyadakı poeziya festivalına və braziliyalı hüquq müdafiəçisinə verilmişdir.

Bunu sentyabrın 28-də Stokholmda mükafat fondu bildirmişdir.

Hindistan vətəndaşı Rut Manorama toxunulmazlar kastasından olan qadınların hüquqları uğrunda mübarizə aparır.

Pentaqonun sabiq əməkdaşı Deniel Elsberq Vyetnamda müharibə zamanı ABŞ Müdafiə Nazirliyinin məxfi sənədlərini dərc etdirmişdir.

Kolumbiyanın Medelyin şəhərində keçirilmiş poeziya festivalı narkobiznesin mərkəzi olan bu şəhərdə əmin-amanlıq yaradılması işinə töhfəsinə görə mükafata layiq görülmüşdür.

Braziliyalı Uiteker Ferreyra korrupsiya ilə mübarizəsinə görə mükafatlandırılmışdır.

Alternativ Nobel mükafatının məbləği təxminən 215 min avrodur. Bu mükafat dekabrın 8-də Stokholmda təqdim ediləcəkdir.