AMEA-da təcrübə keçən tələbələr MEK-də ekskursiyada olublar
Bakı, 15 mart, AZƏRTAC
Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutu və Nəsimi adına Dilçilik İnstitutunda istehsalat təcrübəsi keçən Bakı Avrasiya Universitetinin tələbələri Mərkəzi Elmi Kitabxanada (MEK) ekskursiyada olublar.
Bu barədə AZƏRTAC-a MEK-dən bildirilib. Baş direktor Məmməd Əliyev tələbələrə kitabxananın fəaliyyəti haqqında ətraflı məlumat verib. Daha sonra o, tələbələri kitabxananın Qarabağ müharibəsi qəhrəmanları fondu ilə tanış edib. Tələbələr burada Ulu Öndər Heydər Əliyevin və Azərbaycan Respublikasının Prezidenti, Ali Baş Komandan İlham Əliyevin Qarabağ bölgəsində müxtəlif dövrlərdə çəkilmiş şəkilləri, “Qarabağ Azərbaycandır!” guşəsində müharibə iştirakçılarının fotoları, onların şəxsi kitabxanalarından ailələri tərəfindən fonda hədiyyə olunan kitablardan ibarət kolleksiya, Azərbaycan Respublikasının xəritəsi üzərində 3 minə yaxın şəhid adlarının əks olunduğu “Zəfər memarları” guşəsi, şəhidlərin və müharibə iştirakçılarının həyat və döyüş yolunu əks etdirən məlumatlarla, şəxsi sənədlərlə tanış olublar.
“Bu fond onların xatirəsini yaşadaraq gələcək nəsillərə ötürülməsi baxımından mühüm rola malikdir. İkinci Qarabağ müharibəsi bizim şanlı tariximizdir. 44 günlük müharibə nəticəsində Azərbaycan torpaqlarının uzun müddət davam edən işğalına son qoydu, tarixi ədalət bərpa olundu. Qarabağ tamamilə yenidən qurulur, sıfırdan ən müasir infrastruktur yaradılır, yeni yollar, hava limanları, elektrik stansiyaları, kəndlər, qəsəbələr tikilir. Məhz bu sahədə siz - gənclərin üzərinə böyük məsuliyyət düşür. Aparılan dövlətçilik və quruculuq işlərində yaxından iştirak edərək Vətənimiz, millətimiz, dövlətimiz üçün daha uğurlu fəaliyyət göstərməlisiniz”, - deyə baş direktor tələbələrə müraciət edib.
Daha sonra tələbələr MEK-in digər fondlarının fəaliyyəti ilə tanış olublar.
Bölmənin digər xəbərləri
