Amerika qəzetində yanvar faciəsi haqqında məktub dərc edilmişdir
Vaşinqton, 22 yanvar (AZƏRTAC). ABŞ-ın Viskonsin ştatında çıxan Wisconsin State Journal” qəzetində bu ştatın Midlton şəhərində yaşayan azərbaycanlı Nəzakət Həsəninin 20 Yanvar faciəsi haqqında məktubu dərc edilmişdir.
Məktubda 1990-cı il yanvarın 19-dan 20-nə keçən gecə sovet qoşunlarının Bakıya yeridilməsinin və dinc vətəndaşların kütləvi şəkildə qətlə yetirilməsinin təfsilatı təsvir edilir, vurğulanır ki, bu hadisə Azərbaycanda sovet hakimiyyətinin süqutunun başlanğıcı olmuşdur.
Məktubda həmçinin qeyd edilir ki, sovet qoşunları Azərbaycana hücum etməzdən əvvəl Qazaxıstanda və Gürcüstanda da dinc sakinləri qətlə yetirmiş, sonradan Litvada buna oxşar hadisə baş vermişdi. Lakin 20 Yanvar faciəsi öz qəddarlığına və qurbanların sayına görə, insan hüquqlarının ən kobud şəkildə pozulması və Sovet İttifaqı Kommunist Partiyası tərəfindən dinc əhalinin “kollektiv şəkildə cəzalandırılması”nın ən irimiqyaslı nümunəsidir.
Nəzakət Həsəni məktubunun sonunda Amerikada yaşayan soydaşlarımızı ABŞ Azərbaycanlılar Şəbəkəsinin keçirdiyi kampaniyaya qoşulmağa və Bakı faciəsinin qurbanlarının xatirəsini ehtiramla yad etməyə çağırmışdır.
Yusif Babanlı
Vaşinqton
Bölmənin digər xəbərləri
