AMERİKADA YAŞAYAN AZƏRBAYCANLI GƏNCLƏR İLK FORUMLARINI KEÇİRMİŞLƏR
Forumu açan KAAŞ-nın icraçı direktoru Cavid Hüseynov bildirmişdir ki, Amerikada yaşayan dörd yüz minlik Azərbaycan icması gənc olmasına baxmayaraq, müəyyən şəkildə təşkilatlana bilmişdir. Bununla belə, biz Amerikadakı digər etnik icmalardan hələ öyrənməliyik. Təhsil və maariflənmə Azərbaycan xalqına xas olan cəhətdir və icmamız məhz maarifləndirmə ideyası ətrafında birləşməlidir. Kaliforniyanın Azərbaycan-Amerika Şurasının məqsədi ABŞ-da yaşayan Azərbaycan mənşəli həmvətənlərimizi birləşdirmək, Amerika ilə Azərbaycan arasında mədəni və biznes əlaqələrini möhkəmlətməkdir.
Forumda çıxış edənlər diasporun təşkilatlanması, ABŞ-ın qanunverici orqanları ilə əlaqələrin möhkəmləndirilməsi, habelə Azərbaycanın geosiyasəti və mövcud iqtisadi durumu, təhsil sistemində vəziyyət kimi mühüm mövzulara diqqət yetirmişlər. Amerikanın müxtəlif ştatlarından gələn forum iştirakçıları yerlərdə həyata keçirdikləri layihələr barədə fikir mübadiləsi aparmışlar. “Hyuston-Bakı” Qardaşlaşmış Şəhərlər Assosiasiyasının Texas ştatında uğurlu fəaliyyəti nümunə kimi göstərilmişdir.
Lobbiçilik mövzusunda çıxış edən Adil Bağırov və Gülzar Babayeva gənclərin yaşadıqları ştatda senatorlar və konqres üzvləri ilə təmaslarının vacibliyi haqda danışmışlar. Adil Bağırov demişdir: “Konqresdə Azərbaycan məsələləri üzrə yaradılan işçi qrupunun hazırda iyirmi üzvü var. Bu qrupun daha fəal olması üçün bütövlükdə Azərbaycan icmasının fəallığı gücləndirilməlidir”.
Gənclər Azərbaycan haqda həqiqətlərin yayılmasında internetin artan rolunu da vurğulamışlar.
Los-Anceles Universitetinin professoru, Bakıda doğulmuş İzabella Anikst universitetdəki geniş akademik imkanlardan söhbət açmış, burada təhsil alan azərbaycanlı tələbələrin sayının artacağına ümid etdiyini bildirmişdir.
Forumda çıxış edən Azərbaycanın Los-Ancelesdəki Baş konsulu Elin Süleymanov bildirmişdir ki, Azərbaycan hökuməti Amerikada yaşayan həmvətənlərimizi yaşadıqları ştatların icmasının fəal üzvü görmək istəyir. Baş konsul gəncləri ABŞ-da Azərbaycan maraqlarının müdafiə edilməsi üçün səyləri artırmağa çağırmışdır.
Forumda nüfuzlu Yeyl Universitetinin professoru Firuz Kazımzadənin, Manmaut Universitetinin professoru azərbaycanşünas Tadeuş Svyatoxovskinin Los-Anceles Universitetinin professoru Nayere Tohidinin və Cənubi Kaliforniya Universitetinin professoru Con Odellin iştirakçılara təbrik məktubları oxunmuşdur.
Mədəni proqramla yekunlaşan forumda gənclər maestro Çingiz Sadıqovun, tarzən Məhəmməd Ömrənifarın Azərbaycanın gənc estrada müğənnisi Elnarənin ifasını dinləmişlər.
Bölmənin digər xəbərləri
