AMERİKANIN AZƏRBAYCAN CƏMİYYƏTİ KONQRESDƏ BRİFİNQ KEÇİRMİŞDİR
“Azərbaycan yalnız neft və qaz hasilatçısı, Ermənistan tərəfindən işğala məruz qalan ölkə deyil”. AZƏRTAC-ın xüsusi müxbiri xəbər verir ki, ölkəmizin ABŞ-dakı səfiri Yaşar Əliyev Konqresdəki brifinqdə Amerika qanunvericilərinə Azərbaycana bu cür dar prizmadan yanaşmamağı tövsiyə etmişdir.
Amerikanın Azərbaycan Cəmiyyəti tərəfindən təşkil edilən tədbirdə iki dövlət arasında mövcud strateji tərəfdaşlığa dair məruzə ilə çıxış edən diplomat vurğulamışdır ki, Azərbaycan Konqresdə haqqında danışılmağa və tanınmağa layiqdir. Buna səbəb istənilən qədərdir: ölkəmizin geostrateji mövqeyi, terrora qarşı müharibədə ABŞ-ın ən birinci müsəlman müttəfiqi, bölgənin mühüm enerji daşıyıcıları hasilatçısı və tranzit ölkəsi, dini və mədəni tolerantlıq məskəni olması. Yaşar Əliyev Azərbaycanın xarici siyasət prioritetləri barədə də danışmışdır. O bildirmişdir ki, ölkələrimiz arasında münasibətlərin inkişafında ABŞ və Azərbaycan qanunvericiləri mühüm rol oynayırlar.
Xocalı faciəsinin ildönümünü anma həftəsinə təsadüf edən brifinqdə Amerikanın Azərbaycan Cəmiyyəti Konqres heyətinə Xocalı qırğını haqqında da məlumat vermişdir. Bu barədə ətraflı Montana Universitetinin professoru, bölgəmiz üzrə tanınmış ekspert Tomas Qoltz danışmışdır. Azərbaycanın müstəqilliyinin ilk kəşməkəşli illərini özünün “Azərbaycan gündəliyi” kitabında əks etdirən jurnalist Xocalı hadisələri zamanı ölkəmizdə olduğunu və hadisələrdən dərhal sonra Ağdam şəhərinə gedib qırğından sağ çıxan şahidlərlə söhbət etdiyini bildirmişdir. O vurğulamışdır ki, əksər hallarda hökumətlər baş verən faciələri təbliğat məqsədi ilə şişirdirlər. Amma Xocalı hadisələrinə gəldikdə, qanlı qırğın doğurdan da baş vermişdir.
Brifinqin sonunda dünyanın nüfuzlu CNN telekanalının Xocalı faciəsi haqqında nümayiş etdirdiyi videomaterial göstərilmişdir.
Brifinqdən sonra səfir Yaşar Əliyev AZƏRTAC-ın müxbirinə demişdir: “Dövlətlərimiz arasında strateji tərəfdaşlıq gücləndikcə, Konqresdə Azərbaycan haqqında məlumat da artır. Buna sübut kimi, konqresmen Bill Şusterin Xocalı faciəsi ilə bağlı bəyanatını göstərmək olar. Amma hiss olunur ki, bu məlumat kifayət qədər deyildir. Razılıqla demək istəyirəm ki, brifinq konqres heyətinin marağına səbəb olmuşdur və onlar, o cümlədən konqresmen Bill Şuster burada iştirak etmişlər.”
Bölmənin digər xəbərləri
