AQEM-in Zirvə Toplantısında müzakirə edilən məsələlər Asiyanın gələcəyi baxımından olduqca əhəmiyyətlidir
Bakı, 13 oktyabr, AZƏRTAC
Astanada Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 6-cı Zirvə Toplantısı dünyada baş verən mühüm dəyişikliklər kontekstində baş tutur. AQEM özlüyündə Asiya əhalisinin 90 faizini əhatə edən dövlətlərin birliyi kimi çıxış edir. Bu, eyni zamanda, Asiya iqtisadiyyatının təxminən həmin potensialda inteqrasiyası deməkdir. Ona görə də bu toplantıda müzakirə olunan məsələlər Asiya regionunun gələcəyi və onun Avropa ilə əlaqələri baxımından olduqca əhəmiyyətlidir. Gündəlikdə olan əsas məsələlərdən biri də AQEM-in statusu ilə bağlıdır. Əgər bu müşavirə təşkilata çeviriləcəksə bununla qurumun tarixində keyfiyyətcə yeni mərhələ başlayacaq və daha səmərəli fəaliyyət göstərmək imkanları yaranacaq.
Bu sözləri AZƏRTAC-a açıqlamasında Milli Məclisin deputatı Hikmət Babaoğlu söyləyib.
“Azərbaycanın bu konfransda iştirakı bir neçə aspektdən olduqca əhəmiyyətlidir. Qeyd etmək lazımdır ki, bu beynəlxalq platformanın inteqrasiyası üçün rəsmi Bakı mühüm logistika və qovşaq yaratmağı bacarıb. Hazırda isə yeni reallıqlar kontekstində nəqliyyat-kommunikasiya əlaqələrinin dərinləşməsi və optimallaşması üzrə tamamilə yeni bir dəhliz təklif edir. Bu Zəngəzur dəhlizidir. Zəngəzur dəhlizi orta vektor üzrə bütün növ kommunikasiyaların məsafəsini 300 kilometr qısaltmaqla operativ əlaqələr və inteqrasiya təmin etmək imkanlarına sahibdir. Ona görə də Azərbaycan Prezidenti İlham Əliyev AQEM-in Zirvə Toplantısı zamanı çıxışında bir daha bu məsələyə toxundu. Eyni zamanda, erməni vandalizmini yenidən konfrans iştirakçılarının diqqətinə çatdırmaqla Ermənistanın yenə də regional sülhü təhdid etdiyini bildirdi. Azərbaycan ərazisində bir milyondan çox mina basdıran bir ölkənin indi də kommunikasiyaların açılmasına mane olması şübhəsiz ki, AQEM ölkələrinin qarşılıqlı inteqrasiyasına da mənfi təsir göstərir”, - deyə Milli Məclisin deputatı qeyd edib.
Onun sözlərinə görə, Zirvə Toplantısında regional təhlükəsizlik və əməkdaşlıq məsələləri ilə bağlı Azərbaycan Prezidenti bir sıra ikitərəfli görüşlər keçirib ki, bunların da hər biri milli və regional təhlükəsizliyimizin gələcək strateji arxitekturası baxımından olduqca əhəmiyyətlidir.
Bölmənin digər xəbərləri
