Aşqabadda Xəzərin dəniz mühitinin mühafizəsinə dair regional görüş keçirilmişdir
Bakı, 30 may (AZƏRTAC). Mayın 28-30-da Aşqabadda Xəzərin dəniz mühitinin mühafizəsinə dair Çərçivə Konvensiyası (Tehran Konvensiyası) tərəflərinin V konfransı keçirilmişdir.
AZƏRTAC xəbər verir ki, Avropa üçün ətraf mühit üzrə BMT Proqramının regional ofisi yanında Tehran Konvensiyasının müvəqqəti katibliyinin köməyi ilə keçirilən üç günlük forumun işində Azərbaycan, İran, Qazaxıstan, Rusiya və Türkmənistanın, habelə BMT İnkişaf Proqramının, Ərzaq və Kənd Təsərrüfatı Təşkilatının, Avropa İttifaqının və başqa qurumların nümayəndə heyətləri iştirak edirlər.
Tədbir çərçivəsində Tehran Konvensiyasına dair milli fəaliyyət planlarının və Xəzər dənizinin ətraf mühitin monitorinqi üzrə regional proqramın işlənib hazırlanması kimi məsələlər qaldırılmışdır.
Məsələn, bu sənədlər Xəzəryanı ölkələrin hər biri üçün konkret vəzifə və məqsədlər, o cümlədən milli maraqların nəzərə alınması ilə ekoloji institusional və hüquqi komponentlər müəyyənləşdirir.
Bioloji müxtəlifliyin mühafizəsi, dənizin balıq və digər resurslarından səmərəli istifadə olunması, ətraf mühitin mühafizəsi və qoruq ərazilərinin mühafizəsi üzrə qanunverici bazanın gücləndirilməsi, antropogen fəaliyyət tullantılarının idarə olunması, əhalinin ekoloji təhsil səviyyəsinin artırılması və s. prioritet istiqamətlər sayılmışdır.
2003-cü il noyabrın 4-də imzalanmış və 2006-cı ilin avqustun 12-də qüvvəyə minmiş Tehran Konvensiyası Xəzər dənizi regionunda Xəzəryanı ölkələrin planetimizin nadir təbiət və hidroloji mühiti olan daxili su hövzəsinin saxlanılmasına, gələcək nəsillər üçün sahilyanı ərazilərin sabit inkişafının təmin edilməsinə dair tərəfdaşlıq strategiyasının oriyentirlərini müəyyən edən birinci çoxtərəfli müqavilə sənədidir.
Bölmənin digər xəbərləri
