Astana azərbaycanlı jurnalistin gözü ilə
Astana, 18 iyul, AZƏRTAC
Qazaxıstanın paytaxtı Astana öz imkanları və özünəməxsus ab-havası ilə getdikcə daha çox əcnəbi cəlb edir. Yeni ölkəyə və şəhərə köçmək həmişə müəyyən çətinliklər və kəşflərlə əlaqələndirilir. Astanada bir aydan çox vaxt keçirdikdən sonra əcnəbilərin bu dinamik şəhərdə həyatı necə yaşaya biləcəyi barədə məndə müəyyən fikir formalaşdı.
AZƏRTAC xəbər verir ki, bu məqalə şəxsi təcrübəyə əsaslanaraq Qazaxıstan paytaxtında uyğunlaşma üçün praktiki bələdçidir. Siz yerli özəllikləri öyrənəcək və yeni mühitinizə tez alışmağa kömək edəcək məsləhətlər alacaqsınız.
Fərdi eyniləşdirmə nömrəsinin (FEN) alınması və bank hesabının açılması
Astanaya gəldikdən sonra ən mühüm olan amillər mənzil tapmaq və yerli şəraitə bələd olmaqdır: ərzaq mağazalarının harada yerləşməsi, avtobus biletinin əldə edilməsi, valyuta mübadiləsi və bankların ünvanlarının müəyyən edilməsi.
Qazaxıstan paytaxtına gələnlər üçün ilk tövsiyələrdən biri FEN alınmasıdır. Bu kod demək olar ki, hər yerdə lazımdır.
Növbəti addım “Kaspi Bank”da hesab açmaq, orada kart sifariş etmək və telefonunuza müvafiq proqramı quraşdırmaqdır.
Pul avtomat vasitəsilə hesabınıza yatırıla bilər və o, dərhal tətbiqdə mövcud olacaq. Bu tətbiq kartın yanınızda olmadığı halda da telefonunuzdan istifadə edərək bütün alış-verişləri etməyə imkan verəcəkdir. Bu, çox rahatdır və tez bir zamanda gündəlik həyatın bir hissəsinə çevrilir.
Tətbiq vasitəsilə siz avtobusda gediş haqqı daxil olmaqla hər şey üçün ödəniş edə bilərsiniz.
Astana avtobuslarında QR kodlarını skan etməklə salonun istənilən hissəsində gediş haqqı ödənilə bilər.
Sonradan müfəttiş gəlib gediş haqqını ödəyib-ödəmədiyinizi yoxlaya bilər.
Məhsulların satın alınması və qiymətləri
Astanadakı iri ərzaq mağazalarında balıqdan tutmuş şorbaya qədər hər çeşiddə yerində qızdırıla bilən hazır yeməklər tapmaq olar.
Burada meyvə-tərəvəzin qiyməti Azərbaycandan bir qədər bahadır ki, bu da onların xaricdən gətirilməsi ilə izah olunur.
Astanadakı iri ərzaq mağazaları meyvə və tərəvəz satışında rahat özünəxidmət sistemindən istifadə edir. Alıcı müstəqil olaraq seçilmiş məhsulları xüsusi tərəzilərdə çəkir, onların çəkisini avtomatik müəyyənləşdirir və qiymət etiketini çap edir.
Paytaxtdakı ərzaq mağazalarında da Azərbaycan məhsullarına rast gəlmək olar. Bir çox yerlərdə diqqəti sevimli “Azərçay”ımız çəkir.
Bəzi məhsullar bizimkinə çox bənzəyir, məsələn, “türk ayranı” dad baxımından bizim ayranımıza çox yaxındır.
2GIS tətbiqindən istifadə edilməsi
Astana İşim çayının sağ və sol sahillərinə bölünmüş çoxlu parkları və gəzinti yerləri olan böyük şəhərdir.
Şəhərdə oriyentasiya üçün əvəzsiz köməkçi olan 2GIS tətbiqi mövcuddur.
O, yerinizi müəyyən etməyə imkan verir, dayanacaqlarla ictimai nəqliyyat marşrutlarını göstərir, həmçinin istədiyiniz təyinat yerinə aparacaq taksinin qiymətini göstərir. Bu proqramdan istifadə edərək ən yaxın mağaza və müəssisələri tapa bilərsiniz.
Dövlət xidmətləri sistemi və miqrasiya
Qazaxıstanda Azərbaycanın “ASAN xidmət” xidmətinə bənzər Dövlət Xidmətləri Mərkəzi (DXM) mövcuddur və orada bütün lazımi sənədləri əldə edə bilərsiniz.
Uzun müddət qalmağı planlaşdıran əcnəbilərin barmaq izlərini təqdim etmək üçün onların qaldıqları yer üzrə miqrasiya xidməti şöbələrinə baş çəkməsi məcburidir. Burada növbəyə durmaq üçün səhər tezdən getmək lazımdır.
Yerli sakinlərlə ünsiyyət
Şəhərdə çoxlu kafe və restoranlar var, lakin yeməklərin dadı fərqli ola bilər. Məsələn, buradakı türk dönəri Bakıda olduğundan fərqlidir.
Yerli sakinlərlə ilk təmas bazarda baş verdi, satıcı qadın mənim hansı ölkədən gəldiyimi soruşdu. Mənə bir neçə qazax sözünü izah etdi, ilk öyrəndiyim söz “sağ ol” - “rəhmət” oldu.
Məktəb
Övladlarını Astanada məktəbə göndərməyi planlaşdıran əcnəbilər üçün müəyyən prosedur var. İlk və ən vacib addım yaşayış yerində rəsmi qeydiyyata düşmək, yəni mənzildə qeydiyyatdan keçməkdir. Bu, şəhərdə yaşayış hüququnuzu təsdiqləmək və məktəb bölgəsini müəyyən etmək üçün lazımdır.
Qeydiyyatdan keçdikdən sonra növbəti addım Astana şəhərinin Təhsil İdarəsi ilə əlaqə saxlamaqdır. Burada uşaqların məktəbə qəbulu prosesi haqqında geniş məlumat əldə edə bilərsiniz.
Bu məsləhətlərə əməl edən əcnəbilər nəinki Astanada həyata asanlıqla uyğunlaşa, həm də Qazaxıstan paytaxtının təklif etdiyi unikal atmosferi və imkanları lazımınca qiymətləndirə bilərlər.
AZƏRTAC-ın xüsusi müxbiri
Astana
Bölmənin digər xəbərləri
