Atəşfəşanlıq qadağasına məhəl qoyulmaması Yeni Dehlini dünyanın ən çirkli şəhərinə çevirib
Bakı, 1 noyabr, AZƏRTAC
Cümə günü, noyabrın 1-də hinduların işıq festivalı olan Divali iştirakçılarının atəşfəşanlıq qadağasına məhəl qoymaması və fişəng anbarında baş verən partlayışdan sonra Yeni Dehli dünyanın ən çirkli şəhərləri siyahısına başçılıq edib.
AZƏRTAC “Reuters” agentliyinə istinadla xəbər verir ki, bu hadisə havanın keyfiyyətinin təhlükəli həddə yüksəlməsinə səbəb olub.
İsveçrənin “IQAir” şirkətinin məlumatına görə, havanın keyfiyyət indeksi 348 olub və nəticədə Dehli dünyanın ən çirkli şəhərləri siyahısına başçılıq edib.
Yerli hakimiyyət orqanları Ali Məhkəmənin təlimatlarına uyğun olaraq son bir neçə il ərzində Divali festivalında və qış aylarında fişənglərdən istifadəni qadağan edib, lakin həbs cəzası təhlükəsinə baxmayaraq, onlar qadağaları həyata keçirməkdə çətinlik çəkiblər.
Bəzi hindu qrupları qadağanın festivala müdaxilə etdiyini iddia edib, lakin Yeni Dehli meriyası daha əvvəl bu mövqeyi rədd edərək, sözügedən qərarın insanların həyatını xilas etmək məqsədi daşıdığını bildirib.
Cümə günü havada olan tüstü dumanı, həmçinin Hindistanın şimalındakı fermalarda tullantıların yandırılması ilə üst-üstə düşüb. Bu, hər il qışın əvvəlində havanın keyfiyyətini pisləşdirir, çünki soyuq, ağır hava müxtəlif mənbələrdən gələn çirkləndiriciləri atmosferdə saxlayır.
Bölmənin digər xəbərləri
