Auditor: Həyata keçirilmiş auditlərin məqsədi dövlət vəsaitlərindən səmərəli istifadəni qiymətləndirməkdir - MÜSAHİBƏ
Bakı, 25 dekabr, AZƏRTAC
AZƏRTAC Hesablama Palatasının auditoru Hafiz İsmayılbəyli ilə olan müsahibəni təqdim edir.
- Hesablama Palatasının Naxçıvan Muxtar Respublikası üzrə İdarəsi tərəfindən 2025-ci ilin geridə qalan dövründə hansı növdə və neçə nəzarət tədbiri həyata keçirilib və hansı istiqamətləri əhatə edib?
- Cari dövrədək Hesablama Palatasının Naxçıvan Muxtar Respublikası üzrə İdarəsi tərəfindən 4 uyğunluq auditi və 2 analitik fəaliyyət olmaqla ümumilikdə 6 nəzarət tədbiri həyata keçirilib. Bununla yanaşı, 1 uyğunluq auditi və 1 analitik fəaliyyət həyata keçirilməkdədir. Uyğunluq auditləri ümumdövlət və iqtisadi sahələri əhatə edib. Həmçinin tərəfimizdən Naxçıvan Muxtar Respublika büdcəsinin 2024-cü il üzrə icrasının və 2026-cı il üzrə büdcə layihəsinin analitik təhlili aparılıb.
- Audit obyektləri necə müəyyən edilib və aparılan auditlərin əsas məqsədi nə olub?
- Sualınızın birinci hissəsinə cavab olaraq bildirirəm ki, ilk öncə tərəfimizdən iş planı hazırlanarkən obyektlər risk qiymətləndirilməsi əsasında müəyyən edilir. Sualınızın ikinci hissəsinə əsasən qeyd edim ki, həyata keçirilmiş auditlərin məqsədi dövlət vəsaitlərindən səmərəli istifadəni qiymətləndirmək, maliyyə intizamının qorunmasını təmin etmək, idarəetmə prosesində şəffaflıq və hesabatlılığı artırmaqdan ibarət olub.
- Auditlər zamanı ən çox rast gəlinmiş nöqsanlar hansılardır və onların həcmi nə qədər olub? Aşkar olunan pozuntuların aradan qaldırılması üçün hansı tədbirlər görülüb?
- Apardığımız auditlər zamanı satınalma qanunvericiliyin tələblərinin, əməkhaqqı və bununla bağlı ödəniş qaydalarının, həmçinin aktivlər ilə bağlı çatışmazlıqlara rast gəlinib. Nöqsanların ümumi məbləği barədə məlumatları illik fəaliyyətimiz barədə hesabata daxil edəcəyik. Təsdiq edilmiş kollegiya qərarlarına uyğun olaraq aidiyyəti qurumlara müvafiq göstərişlər verilib və bir sıra hallarda vəsaitlərin büdcəyə qaytarılması təmin edilib. Həmçinin aidiyyəti qurumlar tərəfindən məsul şəxslər barədə intizam tədbirlərinin görüldüyü halları da olub.
- Apardığınız kənar dövlət maliyyə nəzarəti tədbirlərinin nəticələrinin təsiri necə olub və bu nəticələr gələcək planlarınızda hansı istiqamətləri müəyyən edib?
- Aparılan auditlərin nəticələri maliyyə intizamının gücləndirilməsi, vəsaitlərin daha səmərəli idarə olunması və büdcə xərclərinin optimallaşdırılması baxımından mühüm təsir göstərib. Aşkar edilmiş uyğunsuzluqların aradan qaldırılması büdcə yükünün azaldılmasına və idarəetmə proseslərində şəffaflığın yüksəldilməsinə zəmin yaratdığını deyə bilərik. Bu nöqteyi-nəzərdən gələcək planlarımız üzrə əsas hədəfimiz dövlət vəsaitlərinə nəzarəti gücləndirərək risklərin erkən müəyyən edilməsidir.
Bölmənin digər xəbərləri
