AVARÇƏKMƏ ÜZRƏ DÜNYA ÇEMPİONATININ QALİBLƏRİ BAKIYA QAYITMIŞLAR
Bakı, 19 avqust (AZƏRTAC). Kanadada başa çatmış avarçəkmə üzrə dünya çempionatının qalibləri Bakıya qayıtmışlar. Heydər Əliyev adına beynəlxalq hava limanında azərbaycan kanoiçilərini çoxsaylı azarkeşlər, İdman və Gənclər Nazirliyinin nümayəndələri, jurnalistlər qarşılamışlar.
Milli geyimli qızlar Azərbaycan idmançılarına və onların məşqçilərinə güllər təqdim etmişlər. 200 metr məsafəyə yarışlarda birinci olan Valentin Demyanenko jurnalistlərin suallarına cavab verərək demişdir ki, dünyanın ən güclü avarçəkənlərinin iştirak etdiyi çempionatda gərgin mübarizə gedirdi və o, yalnız finişdə artıq qalib olacağına inanmışdı. Dünya çempionu vurğulamışdır ki, o daim Azərbaycandan dəstək hiss edirdi, Prezident İlham Əliyevin təbrikləri xüsusilə xoş idi. Azərbaycan sübut etmişdir ki, idmanın bu növü ölkədə sürətlə inkişaf edir və idmançılar növbəti yarışlara, ilk növbədə, 2010-cu ildə keçiriləcək Avropa çempionatına inamla hazırlaşacaqlar.
Xatırladaq ki, Azərbaycan komandası dünya çempionatı yarışlarında bütöv medal dəsti qazanmışdır. Demyanenkonun qızıl, Sergey Bezuqlıy-Maksim Prokopenko cütlüyü 1000 metr məsafəyə yarışda gümüş və 500 metr məsafəyə mübarizədə isə bürünc medallar qazanmışlar.
######
Bölmənin digər xəbərləri
