Avrokomissiya, İtaliya və Fransa liderləri “köhnə qitə”də dərinləşən miqrasiya problemini müzakirə ediblər
Valletta, 30 sentyabr, AZƏRTAC
Avropa Komissiyasının sədri, İtaliya və Fransa liderləri “köhnə qitə”də artan miqrant axınlarını müzakirə ediblər.
AZƏRTAC xəbər verir ki, müzakirələr Maltanın paytaxtı Vallettada keçirilən Avropa İttifaqına üzv 9 Aralıq dənizi ölkəsinin (“MED 9”) rəhbərlərinin sammiti çərçivəsində aparılıb.
Avropa Komissiyasının sədri Ursula Fon der Lyayen, İtaliyanın Baş naziri Ciorcia Meloni və Fransa Prezidenti Emmanuel Makron arasında keçirilən üçtərəfli görüşdə son dövrlərdə Aralıq dənizi vasitəsilə Avropa istiqamətində miqrasiya təzyiqinin kəskin artdığı qeyd olunub.
Ursula Fon der Lyayen Avropa Komissiyasının miqrasiya probleminin həlli üçün İtaliyaya təqdim etdiyi 10 bəndlik fəaliyyət planının əhəmiyyətini vurğulayıb.
Ciorcia Meloni miqrasiya problemi fonunda konkret struktur həllərin vacibliyini qeyd edib. O, problemi həll etməyin yeganə yolunun beynəlxalq müdafiə hüququnun tətbiqi və qanuni addımları artırmaq olduğunu bildirib.
Fransa Prezidenti isə rəsmi Parisin miqrasiya məsələsində Romaya dəstəyini yeniləyib, problemin həllində birgə yanaşmanın əhəmiyyətini qeyd edib.
Nihad Budaqov
AZƏRTAC-ın xüsusi müxbiri
Valletta
Bölmənin digər xəbərləri
