Avstriyada əhalinin yarıdan çoxu koronavirusa qarşı tam peyvənd olunub
Vyana, 29 iyul, AZƏRTAC
Avstriyada əhalinin 50,15 faizi (4,48 milyon nəfər) koronavirusa qarşı peyvəndin hər iki komponenti ilə peyvənd olunub.
AZƏRTAC xəbər verir ki, bu barədə məlumat elektron peyvənd pasportu sistemi əsasında Səhiyyə Nazirliyi tərəfindən yayılıb. Peyvəndin bir komponenti ilə vaksinasiya olunanların sayı isə əhalinin 58,94 faizini təşkil edir. Məlumatda həmçinin qeyd edilib ki, ölkə üzrə indiyədək 9 milyon 553 min 753 peyvənd dozası istifadə olunub.
Yay tətili mövsümü ilə əlaqədar əhali arasında peyvənd olunanların sayı kəskin şəkildə aşağı düşüb. İyulun 25-də Avstriyada 29 min 358 nəfər peyvənd mərkəzlərinə üz tutub və bu göstərici mayın 24-dən bəri ən aşağı statistika hesab olunur.
Koronavirusun “delta“ ştamının Avstriyada da yoluxmaların əsas hissəsini təşkil etməsini nəzərə alaraq, Səhiyyə Nazirliyi əhalini vaksinasiya kampaniyasında fəal iştiraka çağırıb.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
