Azərbaycan Ağsaqqallar Şurası Ermənistanın son hərbi təxribatları ilə bağlı bəyanat yayıb
Bakı, 6 oktyabr, AZƏRTAC
Azərbaycan Ağsaqqallar Şurası Ermənistanın son hərbi təxribatları ilə bağlı bəyanat yayıb.
Azərbaycan Ağsaqqallar Şurasının sədri, deputat Eldar Quliyev AZƏRTAC-a bildirib ki, bəyanatda deyilir:
“Sentyabrın 27-də səhər saatlarında Ermənistan silahlı qüvvələrinin hərbi mövqelərimizlə yanaşı, yaşayış məntəqələrimizi müxtəlif növ silahlardan və artilleriya qurğularından atəşə tutaraq törətdiyi təxribatlara cavab olaraq Azərbaycan Ordusu cəbhəboyu genişmiqyaslı əks-hücum əməliyyatları aparmağa başlayıb. İşğal altındakı torpaqlarımızı azad etmək və ölkəmizin ərazi bütövlüyünü bərpa etmək kimi müqəddəs vəzifəni yerinə yetirmək üçün əməliyyatlara başlayan Silahlı Qüvvələrimiz qısa müddətdə düşmənə sarsıdıcı zərbələr endirib, böyük miqdarda döyüş texnikasını sıradan çıxarıb, çoxsaylı canlı qüvvəsini məhv edib və yaralayıb. Rəşadətli Ordumuz Cəbrayıl ilə yanaşı, rayonun 10-a yaxın kəndini, Tərtər, Ağdərə və Füzuli rayonlarının bir neçə yaşayış məntəqəsini mənfur düşmənlərdən təmizləyib, Suqovuşan, Murovdağ və bir sıra çox vacib strateji yüksəklikləri ələ keçirib.
Azərbaycan Respublikasının Prezidenti, Ali Baş Komandan İlham Əliyevin Ordumuzun hərbi qüdrətinin artırılması, döyüş qabiliyyətinin yüksəldilməsi, maddi-texniki təchizatının möhkəmləndirilməsi istiqamətində apardığı məqsədyönlü siyasət nəticəsində dünyanın ən güclü orduları sırasında yer alan Silahlı Qüvvələrimiz əldə etdiyi uğurlarla Azərbaycan tarixinin şanlı səhifələrini yazır, xalqımıza qürur dolu anlar yaşadır.
2016-cı ilin aprel və 2020-ci ilin iyul döyüşlərində üzləşdiyi sarsıdıcı zərbələrdən nəticə çıxarmayaraq təxribatlar törətməkdə davam edən və Azərbaycan Ordusu qarşısında aciz duruma düşən, müqavimət göstərmək iqtidarında olmayan erməni hərbçiləri öz həmişəki xain xislətlərinə sadiq qalaraq yenə müharibə cinayətlərinə əl atır, itkilərinin əvəzini cəbhə xəttindən kənardakı yaşayış məntəqələrini artilleriya qurğularından və digər ağır silahlardan istifadə etməklə çıxmağa çalışır, dinc əhalini atəşə tutur, yaşayış binalarını və mülki obyektləri dağıdırlar. Hərbi münaqişəyə digər dövlətləri cəlb etməyə çalışaraq döyüş bölgəsindən kifayət qədər kənarda yerləşən Gəncə və Mingəçevir şəhərlərinə, Abşeron rayonu ərazisinə raket zərbələri endirən Ermənistan silahlı qüvvələri dinc əhaliyə qarşı qanlı cinayətlər törədərək beynəlxalq konvensiyaların tələblərini kobud şəkildə pozmaqdan çəkinmirlər.
Müharibənin qan-qadasız, itkisiz başa gəlmədiyini anlayışla qarşılasaq da, düşmənin təxribatları nəticəsində hərbçilərimiz və mülki əhalimiz arasında həyatını itirənlərin və yaralılarımızın olması bütün xalqımız kimi, ağsaqqalları da son dərəcə üzür. Biz qəhrəman şəhidlərimizə Allahdan rəhmət diləyirik, onların yaxınlarına dərin hüznlə başsağlığı verir, yaralılarımızın tezliklə sağalmasını arzulayırıq.
Dağlıq Qarabağ münaqişəsinin dinc yolla həll olunması üçün Azərbaycan Respublikası rəhbərliyinin verdiyi şansdan istifadə etməyən, təxribatçı bəyanatları ilə sülh danışıqlarından yayınaraq status-kvonu saxlamağa cəhd göstərən Ermənistanın “ağlını başına yığmağa” məcbur etmək missiyası Ali Baş Komandanımız İlham Əliyevin rəhbərliyi altında rəşadətli Azərbaycan Ordusunun üzərinə düşüb. Əminik ki, onlar bu missiyanı şərəflə yerinə yetirməklə xalqımızı 30 illik arzusuna qovuşduracaq, münaqişənin ədalətli həllinə nail olaraq ölkəmizin ərazi bütövlüyünü bərpa edəcək, məcburi köçkün soydaşlarımızın öz ata-baba yurdlarına qayıtmasını təmin edəcəkdir.
Bu şərəfli və məsuliyyətli günlərdə hamımız işğal altındakı torpaqlarımızın azad olunması, müstəqil dövlətçiliyimizin qorunması və daha da inkişaf etdirilməsi naminə Azərbaycan Prezidenti İlham Əliyevin ətrafında daha sıx birləşməliyik. Bu çətin dönəmdə biz ağsaqqallar gənclik enerjisi ilə fəaliyyət göstərməli, Vətənimiz uğrundakı bu ölüm-dirim mübarizəsində hərəmiz öz mövqeyimizdə daha əzmlə çalışmalıyıq. Azərbaycanın şanlı tarixi boyu ən məsuliyyətli məqamlarda hər zaman xalqın önündə olmuş respublika ağsaqqalları torpaqlarımızın azadlığı uğrunda başlanmış bu müharibədə də yüksək döyüş ruhu ilə dövlətimizin, Silahlı Qüvvələrimizin və onun Ali Baş Komandanının yanındadırlar. Biz bu məsul günlərdə bütün xalqımızı milli həmrəylik göstərməyə, hər bir sahədə düşmənə layiqli cavab verməyə çağırırıq.
Bu gün Azərbaycan əsgərinin rəşadəti bizi o qədər ruhlandırıb ki, Respublika Ağsaqqallar Şurasının hər bir üzvü yaşından asılı olmayaraq, gənclərlə yanaşı döyüşə atılmağa, üzərinə düşən vəzifələri şərəflə yerinə yetirməyə hazırdır. Bu günlərdə hamımızın qəlbi dövlətimizin başçısının irəli sürdüyü “Qarabağ bizimdir, Qarabağ Azərbaycandır!” şüarı ilə döyünür. Qələbə bizimlədir, çünki bizim işimiz haqq işidir, biz Vətənimiz uğrunda, torpaqlarımızı işğaldan azad etmək üçün vuruşuruq! Biz əminik ki, Azərbaycan Respublikasının Prezidenti, Ali Baş Komandan İlham Əliyevin başçılığı altında qüdrətli ordumuz işğal altındakı bütün torpaqlarımızı tezliklə azad edərək Vətənimizin ərazi bütövlüyünü təmin edəcək və şanlı bayrağımızı Şuşada, Xankəndidə dalğalandıracaqdır!
Allah şanlı Ordumuzu və Ali Baş Komandanımız İlham Əliyevi qorusun!”.
Bölmənin digər xəbərləri
