Azərbaycan-Avstriya əlaqələrinin daha da inkişafı üçün yaxşı imkanlar var
Bakı, 11 sentyabr (AZƏRTAC). Sentyabrın 11-də Azərbaycanın xarici işlər naziri Elmar Məmmədyarov Avstriyanın Avropa, inteqrasiya və xarici işlər federal naziri Sebastian Kurtsun başçılıq etdiyi nümayəndə heyəti ilə görüşüb.AZƏRTAC xəbər verir ki, görüşdən sonra nazirlər birgə mətbuat konfransı keçiriblər.
Elmar Məmmədyarov görüşdə bir çox məsələlərin, o cümlədən regiondakı mövcud münaqişələrin müzakirə edildiyini söyləyib. O, avstriyalı nazirə Ermənistan-Azərbaycan, Dağlıq Qarabağ münaqişəsinin həlli ilə bağlı danışıqların hazırkı vəziyyəti haqqında məlumat verdiyini, rəsmi Bakının mövqeyini onun diqqətinə çatdırdığını bildirib.
E.Məmmədyarov Azərbaycan ilə Avstriya arasında iqtisadi əməkdaşlığın gündən-günə möhkəmləndiyini vurğulayıb. O əlavə edib ki, Avstriya şirkətləri Azərbaycanda, Azərbaycan şirkətləri isə Avstriyada uğurla fəaliyyət göstərirlər.
Sebastian Kurts deyib ki, ölkələrimiz arasında münasibətlər yaxşı səviyyədədir. İkitərəfli əlaqələrin daha da inkişafı üçün yaxşı imkanlar var. Bu səfər əməkdaşlığımızın daha da inkişafına töhfəsini verəcək.
Avstriyalı nazir regiona səfəri zamanı keçirdiyi görüşlərdə mühüm məsələlərin müzakirə edildiyini diqqətə çatdırıb. S.Kurts Dağlıq Qarabağ münaqişəsinin sülh yolu ilə həll olunacağına ümid etdiklərini bildirib.
Bölmənin digər xəbərləri
