AZƏRBAYCAN BAKI-TBİLİSİ-CEYHAN BORU KƏMƏRİNİ DOLDURMAQ ÜÇÜN KİFAYƏT QƏDƏR NEFT ÇIXARACAQDIR
Bakı-Tbilisi-Ceyhan (BTC) boru kəmərini doldurmaq üçün 2008-2009-cu illərdə Azərbaycanda kifayət qədər neft çıxarılacaqdır. Bunu “bp-Azərbaycan” şirkətinin prezidenti Devid Vudvord mətbuat konfransında bəyan etmişdir.
O demişdir ki, “Azəri-Çıraq-Günəşli” müqavilə yatağında 2008-2009-cu illərdə 50 milyon ton neft hasil olunacaqdır ki, bu da BTC-nin doldurulması üçün kifayətdir. Hasilatın həmin səviyyəsi xeyli müddət qalacaqdır. Bu isə Bakı-Tbilisi-Ceyhan layihəsini kommersiya baxımından doğruldur.
“bp-Azərbaycan”ın başçısı layihəyə Qazaxıstanın da qoşulmasını məqsədəuyğun sayır. Hazırda BTC boru kəməri şirkətinin səhmdarları arasında Qazaxıstanda işləyən 4 xarici şirkət də vardır. Devid Vudvord bildirmişdir ki, onlar Qazaxıstanda çıxardıqları neftin BTC boru kəməri ilə ixrac olunmasını perspektivli hesab edirlər. Onun fikrincə, lazım gələrsə, neftin nəqli zamanı kimyəvi reagentlərdən istifadə etməklə və əlavə nasos stansiyaları qoymaqla, boru kəmərinin buraxma qabiliyyətini 20 faiz artırmaq mümkün olacaqdır. Devid Vudvord vurğulamışdır ki, indi işləyən Bakı-Novorossiysk və Bakı-Supsa boru kəmərlərinin gücünə də artırmaq mümkündür.
Bölmənin digər xəbərləri
