AZƏRBAYCAN BOKSÇULARI AVROPA BİRİNCİLİYİNDƏ 7 MEDAL QAZANMIŞLAR
Bakı, 24 avqust (AZƏRTAC). Azərbaycanın gənclərdən ibarət boks üzrə yığma komandası Polşada başa çatmış Avropa birinciliyində 7 medal qazanmışdır.
Yığma komandamızın heyətində ən yüksək nəticəni Elvin Məmişzadə (48 kq) göstərmişdir. Bütün rəqiblərini məğlub edən idmançımız Avropa çempionu olmuşdur.
Azərbaycan boksçuları arasında Elvin İsayev (54 kq) və Emil Əhmədov (69 kq) gümüş, Elnur Zeynalov (51 kq), Elvin Əliyev (57 kq), Heybətulla Hacıəliyev (60 kq) və Murad Ağamalıyev (75 kq) isə bürünc medal qazanmışlar.
Komanda hesabında Azərbaycan yığması 35 ölkə arasında ikinci yeri tutmuşdur.
Əldə olunmuş uğur münasibətilə avqustun 24-də Azərbaycan Boks Federasiyasının (ABF) birinci vitse-prezidenti Ağacan Əbiyev yığma komandanın üzvləri ilə görüşmüşdür.
Azərbaycan Dövlət Bədən Tərbiyəsi və İdman Akademiyasında keçirilən görüşdə A.Əbiyev idmançılarımızın qitə birinciliyində çıxışını böyük nailiyyət kimi dəyərləndirmişdir. A.Əbiyev ABF-nin prezidenti Kəmaləddin Heydərov tərəfindən boksçularımız üçün hər cür şəraitin yaradıldığını, idmançıların isə onlara göstərilən etimadı doğrultduqlarını söyləmişdir.
Yığma komandanın baş məşqçisi Şamil Əlimzanov çıxışında komandaya yaradılan şəraitə görə ABF-nin rəhbərliyinə minnətdarlığını bildirmişdir.
Bölmənin digər xəbərləri
