Bakı, 30 yanvar, AZƏRTAC

Heç kəsə sirr deyil ki, hər bir xalqın davamlı və xoşbəxt gələcəyinin təmin olunması, ilk növbədə, gənc nəslin düzgün yetişdirilməsi, gənclərin milli-mənəvi dəyərlərə, doğma dillərinə, adət-ənənələrinə olan dərin hörməti ilə bağlıdır. Azərbaycan gəncliyi hər zaman ölkəmizin ictimai-siyasi həyatında lokomotiv rolunu oynayaraq dövlətçiliyin qurulması, möhkəmləndirilməsi və inkişafı mərhələsində öz bilik, bacarıqları ilə bu proseslərdə iştirak edib, Vətənə, dövlətə bağlılığını, eləcə də Vətənin qorunmasının ən ali hədəf olduğunu bu uzun müddət ərzində mənimsəmişdir.

Bu fikirləri AZƏRTAC-a açıqlamasında Milli Məclisin deputatı Məzahir Əfəndiyev deyib.

O qeyd edib ki, Azərbaycanı gənclər ölkəsi, gəncləri isə Azərbaycanın gələcəyi adlandıran Ulu Öndər Heydər Əliyevin hakimiyyətə gəldikdə ən birinci görüşü məhz gənclərlə olub. Ümummilli Lider bu görüşdə gənclərə böyük ümid bəslədiyini, müstəqil Azərbaycanın dövlətçilik ənənələrinin qorunması üçün gənclərə arxayın olduğunu bildirmişdi. Məhz bu görüşdən sonra Azərbaycanda gənclər siyasəti dövlətin prioritet istiqamətlərindən biri kimi müəyyən olunaraq gənclər siyasətinin institutlaşdırılması istiqamətində ilk addımlar atıldı, Ulu Öndər Heydər Əliyevin 1994-cü il 26 iyul tarixli Fərmanı ilə yaradılmış Gənclər və İdman Nazirliyi dövlətin əsas resursu kimi, gənclərin təlim-tərbiyəsi, Vətənə xidmətini əhatə edən böyük strateji sənədlərin hazırlanmasına başladı, gənclərlə iş sahəsində vahid dövlət siyasətinin reallaşdırılmasını təmin etdi.

“Bu ardıcıllıqla Azərbaycanda ilk dəfə 1995-ci ildə ölkədə fəaliyyət göstərən gənclər təşkilatlarının Milli Şurası yaradıldı və bu qurum Azərbaycanın bütün gənclər təşkilatlarını əhatə etməklə dövlətin hazırladığı sənədlərin hamısında gəncləri düşündürən məsələlərin yer almasını ortaya qoyurdu.

Həmin il Ümummilli Liderin gənclər forumunun təşkili ilə bağlı irəli sürdüyü təşəbbüsdən sonra 1996-cı ildən başlayaraq Azərbaycan gənclərinin forumları təşkil edilib. 1996-cı il fevralın 2-də keçirilən Azərbaycan Gənclərinin I Forumunda Heydər Əliyev gənclər qarşısında tarixi bir vəzifə qoymuşdur: “Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir”.

Ulu Öndər Heydər Əliyevin gənclərə olan etimadının, inamının yüksəkliyi Azərbaycanda, eyni zamanda, Gənclər Gününün təsis olunması kimi tarixi günlə də yadda qalır. 1997-ci ilin fevral ayının 1-də Prezident sarayında gənclərlə Azərbaycan Gənclərinin I Forumunun bir illiyinə həsr olunmuş görüşdə Ulu Öndər gənclərin müraciətinə diqqətlə yanaşaraq 1997-ci il fevralın 2-də imzaladığı Fərmana əsasən, 2 fevral tarixini Azərbaycan Gəncləri Günü elan edib. Həmin vaxtdan etibarən bu gün MDB məkanında və Şərqi Avropa ölkələri arasında ilk dəfə olaraq Azərbaycanda təntənəli şəkildə qeyd edilməyə başlanıb.

Görülən işlərin davamı olaraq Azərbaycan Prezidentinin 1999-cu il iyulun 29-da imzaladığı “Dövlət gənclər siyasəti haqqında” Fərmanla gənclərin inkişafı üçün Gənclər və İdman Nazirliyinin nəzdində Gənclərin problemləri üzrə elmi araşdırmalar mərkəzi yaradıldı. Həyata keçirilən ardıcıl tədbirlərin məntiqi sonluğu olaraq, gənclərin fəaliyyəti qanunvericilikdə də öz əksini tapdı. Belə ki, Milli Məclis 2022-ci il aprelin 9-da “Gənclər siyasəti haqqında” Qanunu qəbul etdi”, - deyə Məzahir Əfəndiyev bildirib.

Onun sözlərinə görə, keçən müddət ərzində Azərbaycan gəncliyi vətənpərvərlik, dövlətə sədaqət, intellekt, dünyagörüşü, habelə ictimai-siyasi məsələlərə fəal yanaşma baxımından çox yüksək səviyyədə inkişaf edib. Rəşadətli Azərbaycan Ordusunun sıralarındakı Vətən uğrunda qəhrəmancasına vuruşan igid gənclərimiz öz adlarını xalqımızın ən yeni tarixinə qızıl hərflərlə yazıblar.

Mütəmadi olaraq təkmilləşdirilən gənclər siyasəti gənc nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə, bütövlükdə, kreativ gəncliyin formalaşmasına şərait yaradıb. 2011-ci il dekabrın 19-da yaradılan, daha sonra 2018-ci ildə yenidən təşkil edilən Azərbaycan Respublikasının Gənclər Fondu gənclərin elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli layihələrini qrant şəklində maliyyələşdirərək onların müasir dövrün çağırışlarını daha yaxşı qarşılamasına dəstək olur. Dördüncü Sənaye İnqilabı ilə bağlı olan yeniliklər, ilk növbədə, Azərbaycanda gənclər tərəfindən mənimsənilir və bu siyasət gənclər xətti ilə icra olunur.

Bu baxımdan, Dördüncü Sənaye İnqilabının gətirdiyi yeni düzəndə Azərbaycanın rəhbərliyi ilə bir sıra beynəlxalq təsisatların Gənclər Şəbəkəsinin yaradılması ölkəmizin günümüzün ən əhəmiyyətli inkişaf sənədi sayılan “2030-cu ilədək Davamlı İnkişaf sahəsində Gündəliyi”nin 17-ci Məqsədinin əsas hədəfi olan qlobal tərəfdaşlığın gücləndirilməsi çağırışına cavab verən fəaliyyətinin nəticəsidir.

Deputat vurğulayıb ki, son illərdə Azərbaycan gəncliyi özünü beynəlxalq platformalarda, xüsusilə “2030 Gündəliyi”nin icrasında yüksək səviyyədə təqdim etməyi bacarıb. Ötən il Bakıda keçirilmiş BMT-nin COP29 Konfransı çərçivəsində Yaşıl Zonada fəaliyyət göstərən, təqribən 7000 insanın ziyarət etdiyi “Gənclər Evi” pavilyonunda davamlılıq və iqlim liderliyi mövzularında seminarlar, vörkşoplar və panel müzakirələri olmaqla ümumilikdə 27 tədbir təşkil olunub.

COP29-un uğurlu təşkilində Azərbaycan gəncliyi könüllülük hərəkatı çərçivəsində də fəal iştirak edib. Bir sıra mötəbər və irimiqyaslı beynəlxalq tədbirlərin ölkəmizdə yüksək səviyyədə keçirilməsi Birinci vitse-prezident Mehriban xanım Əliyevanın vurğuladığı kimi, könüllülərin yorulmaz, vətənpərvər, müasir çağırışlara cavab verən keyfiyyətlərinin yüksək olması ilə bağlıdır.

“Əminliklə deyə bilərik ki, dövlətin gənclərə dəstək və diqqət göstərməsi nəticəsində Azərbaycan gəncliyində öz gücünə, istedadına inam hissi artıb. Prezident İlham Əliyevin qeyd etdiyi kimi, “Biz haqlı olaraq fəxr edirik ki, Azərbaycan vətəndaşlarıyıq və gənclər həm öz gələcək həyatını düzgün müəyyən etmək üçün və eyni zamanda, dövlətə maksimum xeyir vermək üçün fəal olmalıdırlar”. İnanırıq ki, Azərbaycanın gənclər ordusu göstərilən etimadı yüksək dəyərləndirərək, Müzəffər Ali Baş Komandan, Prezident İlham Əliyevin ətrafında bundan sonra da sıx birləşəcək, dünyada Azərbaycan tarixinin, mədəniyyətinin, incəsənətinin, ədəbiyyatının, idmanının düzgün təbliğ olunmasında səylərini əsirgəməyəcək”, - deyə Məzahir Əfəndiyev bildirib.