Azərbaycan güləşçisi Elis Manolova Avropa çempionatında gümüş medal qazanıb
Bakı, 1 aprel, AZƏRTAC
Macarıstanın paytaxtı Budapeştdə güləş üzrə Avropa çempionatı davam edir.
AZƏRTAC xəbər verir ki, qadın güləşçimiz Elis Manolova (65 kq) mübarizəyə B qrupundan qoşulub. Təmsilçimiz ilk görüşdə Avropa ikincisi Tatyana Rijkoya (Ukrayna) məğlub olub - 0:7. E.Manolova qrupda sonuncu görüşünü estoniyalı Viktoriya Essoya qarşı keçirib və rəqibinə 6:3 hesabı ilə qalib gəlib. Qrupda ikinci yeri tutan E.Manolova yarımfinala yüksəlib. Millimizin üzvü 2019-cu ildə Avropa çempionatının finalında məğlub etdiyi Krişta İnçe (Rumıniya) ilə qarşılaşıb. Gərgin idman mübarizəsi şəraitində keçən görüşdə (2:1) qalib gələn güləşçimiz dördüncü dəfə Avropa çempionatının finalına yüksəlib. Güləşçimiz qızıl medal uğrunda ukraynalı Tatyana Rijkoyla mübarizə aparıb. Rəqibinə növbəti dəfə məğlub olan (0:4) E.Manolova gümüş medal qazanıb.
Beləliklə, E.Manolova 4-cü dəfə qitə birinciliyində fəxri kürsüyə qalxıb. Onun hesabında 1 qızıl və 3 gümüş medal var.
Bölmənin digər xəbərləri
