Azərbaycan Hərb Tarixi Muzeyində “Vətən uğrunda köz olan ömür!” adlı anım tədbiri keçirilib
Bakı, 20 dekabr, AZƏRTAC
Dekabrın 20-də Azərbaycan Hərb Tarixi Muzeyində Birinci Qarabağ müharibəsinin şəhidi, kəşfiyyatçı kapitan Teymur İbrahimovun anadan olmasının 50 illik yubileyinə həsr olunmuş “Vətən uğrunda köz olan ömür!” adlı anım tədbiri keçirilib.
AZƏRTAC xəbər verir ki, tədbir Hərb Tarixi Muzeyi ilə “Müharibə Veteranları və Beynəlmiləlçi Hərbçilər” İctimai Birliyinin birgə təşkilatçılığı ilə reallaşıb.
Əvvəlcə Azərbaycanın ərazi bütövlüyü və suverenliyi uğrunda şəhid olan qəhrəmanlarımızın ruhu bir dəqiqəlik sükutla anılıb. Azərbaycan Respublikasının Dövlət Himni səsləndirilib.
Anım tədbirində keçmiş korpus komandiri, general Yaşar Aydəmirov, Azərbaycan Milli Müdafiə Universitetinin professoru, tarix elmləri doktoru, ehtiyatda olan polkovnik Nurulla Əliyev, Hərbi kollecin rəis müavini, polkovnik-leytenant Pünhan Məmmədov, Azərbaycan Vətən Müharibəsi Veteranları İctimai Birliyinin sədr müavini, ehtiyatda olan mayor Salman Hüseynov, hərbi hissənin keçmiş kəşfiyyat rəisi Dağbəyi Məhyəddinov və şəhid kapitanın ailə üzvləri, onun silahdaşları iştirak ediblər.
Muzeyin rəisi, ehtiyatda olan polkovnik Əzizağa Qəni-zadə tədbirdə çıxış edərək Teymur İbrahimovun qəhrəmanlığı və döyüş yolundan bəhs edib.
O bildirib ki, Azərbaycanın müstəqillik tarixində özünəməxsus yer tutan Qarabağda hərbi əməliyyatlar zamanı neçə-neçə igid oğullar canlarından keçərək şəhidlik zirvəsinə yüksəliblər. Belə Vətən övladlarından biri də qorxmaz kəşfiyyatçı kapitan Teymur İbrahimovdur. Birinci Qarabağ müharibəsi zamanı Teymur İbrahimov da fədakar, qorxmaz silahdaşları ilə düşmənin arxasına sızmağı bacaran kəşfiyyatçı idi. Azərbaycan Hərb Tarixi Muzeyindəki bu tədbir cəsur kəşfiyyatçının xatirəsini anmaq üçün keçirilir.
Azərbaycanın o ağır dövrlərində müxtəlif bölgələrdə toplanışlar keçirilir, əsgəri bölmələr komplektləşdirilərək cəbhəyə göndərilirdi. Belə taborlardan biri də Qusar rayonunda yaradılmışdı. Əslən Xaçmaz rayonunun Qusarçay kəndindən olan 18 yaşlı T.İbrahimov çağırışla şəxsi heyətin sırasına daxil edilmişdi. Üç ay hazırlıq keçdikdən sonra ağır döyüşlərin getdiyi Qubadlı-Laçın bölgəsinə tabor göndərilmişdi. O, çətin döyüşlərdə daha da mətinləşmişdi. Bacarığını nəzərə alıb döyüş bölgəsində taqım komandiri vəzifəsini ona tapşırmışdılar. Beləliklə, zabit kursunu bitirdikdən sonra leytenant rütbəsinə layiq görülmüşdü. Atəşkəsdən sonra kəşfiyyata marağı olan və bacarıqlı zabit kimi hörmət qazanmış T.İbrahimovu kəşfiyyatçıların bölük komandiri vəzifəsinə təyin etmişdilər. O, bu vəzifənin də öhdəsindən layiqincə gəlmişdi.
Azərbaycan torpaqlarının erməni işğalçılarından müdafiəsində igidlik göstərdiyinə, hərbi hissə qarşısında qoyulmuş tapşırıqların yerinə yetirilməsində fərqləndiyinə görə, T.İbrahimov 1998-ci ildə Azərbaycan Prezidenti Heydər Əliyevin Fərmanı ilə “Hərbi xidmətlərə görə” medalı ilə təltif edilmişdi.
“Lakin sonuncu tapşırığı yerinə yetirmək mümkün olmadı. Gənc zabit 1998-ci il avqustun 26-da döyüş tapşırığını yerinə yetirərkən 24 yaşında qəhrəmancasına şəhid olmuşdu.
Cəsur kəşfiyyatçı Vətən uğrunda canını fəda etməklə adını Azərbaycanın qəhrəmanlıq tarixinə əbədi həkk etdirib”, - deyə Əzizağa Qəni-zadə vurğulayıb.
Sonra Teymur İbrahimova həsr olunmuş sənədli film nümayiş etdirilib.
Tədbirdə Nurulla Əliyevin müəllifliyi ilə çap olunan Vətən müharibəsində qazanılmış şanlı Zəfərə həsr olunmuş “44 günlük Vətən müharibəsi” adlı kitab təqdim edilib.
Bölmənin digər xəbərləri
