SİYASƏT
Azərbaycan ilə Moldovanın hakim partiyalarının gəncləri arasında əməkdaşlıq məsələləri müzakirə edilib
![Azərbaycan ilə Moldovanın hakim partiyalarının gəncləri arasında əməkdaşlıq məsələləri müzakirə edilib](/files/2022/3/1200x630/16680140893257524109_1200x630.jpg)
Kişineu, 9 noyabr, AZƏRTAC
Azərbaycan ilə Moldovanın hakim partiyalarının gəncləri arasında əməkdaşlıq inkişaf etdirilir.
AZƏRTAC xəbər verir ki, Moldova Respublikasının Parlamentində Yeni Azərbaycan Partiyasının Gənclər Birliyinin sədri Bəxtiyar İslamov və Bakı Gənclər Mərkəzinin direktoru Nərgiz Babayeva Moldovanın hakim Hərəkat və Həmrəylik Partiyasının gənc deputatları ilə görüş keçiriblər.
Görüşdə YAP-ın nümayəndələri Azərbaycanda həyata keçirilən uğurlu gənclər siyasəti, dövlət tərəfindən gənclərə göstərilən yüksək diqqət və qayğı, eləcə də, YAP Gənclər Birliyinin fəaliyyət istiqamətləri, həyata keçirilən layihələr haqqında qarşı tərəfə geniş məlumat veriblər.
Eyni zamanda tərəflər arasında gənclər sektoru üzrə birgə layihələrin həyata keçirilməsi, əməkdaşlıq imkanları və perspektivləri, o cümlədən gənclərin texnologiya və innovasiyalar üzrə bacarıqlarının artırılması istiqamətində təcrübə mübadiləsi müzakirə olundu.
Görüş iştirakçıları qarşılıqlı maraq kəsb edən məsələlərlə bağlı fikir mübadiləsi aparıblar.
Öz növbəsində Bəxtiyar İslamov Moldova səfərindən xoş təəssüratlarını bölüşərək, moldovalı gəncləri Azərbaycana dəvət edib.
Kişineu