Azərbaycan Karate Federasiyasının rəsmisi: Təmiz idman bizim əsas prioritetimizdir - MÜSAHİBƏ
Bakı, 9 iyul, AZƏRTAC
Azərbaycan Karate Federasiyası prezidentinin köməkçisi Vüsal Abdullazadə dopinqə qarşı mübarizə və təmiz idman prinsipləri mövzusunda AZƏRTAC-ın suallarını cavablandırıb. Müsahibəni təqdim edirik.
- Son illər dopinq məsələsi idman gündəmində daha çox yer almağa başlayıb. Azərbaycan Karate Federasiyası bu problemə necə yanaşır?
- Doğrudur, dopinq bu gün idman ictimaiyyətinin qarşısında duran ən mühüm problemlərdən biridir. Azərbaycan Karate Federasiyası olaraq, bu məsələni olduqca ciddi qəbul edirik. Bizim əsas prinsiplərimizdən biri təmiz idman, yəni, ədalətli rəqabət, şəffaf nəticə və sağlam idman mühiti yaratmaqdır. Dopinqə qarşı mübarizə bizim üçün yalnız qayda pozuntusunun qarşısını almaq deyil, həm də gənc idmançılarda düzgün idman təfəkkürünü formalaşdırmaqdır. Bu, həm sağlamlığa, həm də idmanın nüfuzuna birbaşa təsir göstərən məsələdir.
- Yarışlarda antidopinq nəzarəti necə həyata keçirilir?
- Federasiyanın təşkil etdiyi bütün rəsmi yarışlarda Azərbaycan Milli Antidopinq Agentliyi (AMADA) ilə əməkdaşlıq edirik. AMADA-nın nümayəndələri yarışlarda iştirak edir, nümunələr götürülür və bütün proses beynəlxalq standartlara uyğun aparılır. Bizim məqsədimiz sadəcə nəzarət deyil, həm də idmançılar arasında məsuliyyət hissini gücləndirməkdir. Onlar bilməlidirlər ki, dopinqdən istifadə etmək həm sağlamlığa, həm də karyeralarına böyük zərbədir.
- Dopinqə qarşı mübarizə yalnız yarış vaxtı ilə məhdudlaşmır. Zaldan kənarda idmançılara necə nəzarət edirsiniz?
- Tamamilə doğrudur. Zaldan kənarda nəzarət dopinqə qarşı mübarizənin mühüm hissəsidir. Çünki bəzi hallarda idmançılar dopinq vasitələrindən yarışdan əvvəl, hazırlıq mərhələsində istifadə edirlər. Bu səbəbdən təkcə yarış günlərini deyil, bütün hazırlıq prosesini əhatə edən yanaşma tətbiq edirik. Federasiya olaraq, idmançılarla fərdi söhbətlər aparır, maarifləndirici seminarlar təşkil edirik. Bu tədbirlərdə dopinq maddələrinin riskləri, hüquqi nəticələri və etik tərəfləri ətraflı şəkildə izah olunur. Məqsəd cəza vermək deyil, düzgün yanaşmanın təşviqidir.
- AMADA ilə əməkdaşlığınız hansı səviyyədədir?
- AMADA ilə əməkdaşlığımız davamlı və sistemlidir. Onların təşkil etdiyi təlimlərdə federasiya nümayəndələri, məşqçilər və idmançılar mütəmadi olaraq iştirak edirlər. Həmçinin bir sıra yarışlarda birgə nəzarət və məlumatlandırma işləri aparırıq. Biz bu əməkdaşlığı çox yüksək qiymətləndiririk və hesab edirik ki, milli federasiyalarla antidopinq qurumlarının birgə fəaliyyəti olmadan uğurlu nəticə əldə etmək çətindir.
- Gənc karateçilər dopinq riskindən necə qorunmalıdırlar?
- Əsas məsələ düzgün tərbiyə və maarifləndirmədir. Gənc idmançıya hələ başlanğıcdan öyrədilməlidir ki, uğur əziyyət, fədakarlıq və təmiz mübarizə ilə gəlir. Dopinq heç bir zaman qalibiyyətin alternativi ola bilməz.
Azərbaycan Karate Federasiyası olaraq, gəncləri bu sahədə daim dəstəkləyir, onlara həm texniki, həm də etik baxımdan düzgün yol göstərməyə çalışırıq. Valideynlər, məşqçilər və cəmiyyət də bu işdə aktiv rol oynamalıdır.
- Son olaraq, ictimaiyyətə və idmançılara nə mesaj vermək istərdiniz?
- İdman yalnız medal və nəticə uğrunda yarış deyil, həm də xarakterin yetişməsi və yüksək əxlaqın təcəssümüdür. Dopinq isə bu əsas prinsipləri kökündən pozur və idmanın ruhuna xələl gətirir. Mən bütün idmançılarımıza, xüsusilə gənclərə deyirəm: öz bacarıqlarınıza güvənin, sağlamlığınızı qoruyun və mübarizənizi ədalətli, şəffaf və təmiz şəkildə aparın. Azərbaycan Karate Federasiyası olaraq, yarış meydanında olduğu kimi, həyatın bütün sahələrində hər zaman sizin yanınızdayıq. Yekun olaraq vurğulamaq istəyirəm ki, təmiz idman həm fərdi, həm də kollektiv uğurun əsas sütunudur. Bu yolda federasiya olaraq biz daim dəstək verəcək, idmançılarımızın inkişafı və rifahı üçün əzmlə çalışacağıq.
Bölmənin digər xəbərləri
