Azərbaycan Milli Məclisi İtaliyada konfrans təşkil edir
Bakı, 9 dekabr, AZƏRTAC
Azərbaycan-İtaliya parlamentlərarası işçi qrupunun və Azərbaycan-İtaliya Assosiasiyasının təşəbbüsü, İtaliya Senatının dəstəyi ilə Milli Məclis tərəfindən dekabrın 10-da Romada “İslam ənənəli dövlətlərdə dini birgəyaşayış. Müsəlman ölkəsində müxtəlif dinlərin yanaşı mövcudluğu: Azərbaycan təcrübəsi” mövzusunda konfrans təşkil ediləcək.
Milli Məclisin mətbuat xidmətindən AZƏRTAC-a bildiriblər ki, tədbirdə Azərbaycanla yanaşı, İtaliya, Vatikan Dövləti və digər ölkələrin siyasi və dini qurumlarının, eləcə də elmi-tədqiqat müəssisələrinin və mərkəzlərinin nümayəndələri iştirak edəcəklər.
Konfransda İslam ənənələri mövcud olan dövlətlərdə müsəlmanların, xristianların və yəhudilərin birgə yaşayışı ilə bağlı hazırkı vəziyyət barədə məruzələr dinləniləcək, müzakirələr aparılacaq.
Milli Məclisin deputatları Əli Hüseynli, Azər Kərimli, Qüdrət Həsənquliyev, Mixail Zabelin və Yevda Abramov konfransda iştirak edəcəklər.
Bölmənin digər xəbərləri
