Bakı, 22 sentyabr, Pərvanə Qarayeva, AZƏRTAC

Artilleriya yaylım atəşləri susub. Onlarca yeni mövqedə bayraqlarımız dalğalanır. Gözəl Göyçə gölünə və Naxçıvan dağlarının möhtəşəm zirvələrinə baxanda təsvirəgəlməz mənzərə açılır. Başı bəlalar görmüş xalqımızın övladlarının - əkinçi və ya çoban, turist və ya tədqiqatçı təbiətşünas, hərbçi və ya mülki şəxslərin - qarşı tərəfdəki yüksəklikdə barmağını optik silah tətiyində tutmuş mənfur düşmən tərəfindən izlənməsindən ehtiyat etməyərək yenidən rahat və təhlükəsiz şəraitdə yaşayıb yaratması, Vətən torpağının hər qarışını əkib becərə bilməsi üçün canlarından keçmiş şəhidlər son mənzilə yola salınıb.

Şərti sərhəddəki düşmən qovulub. Sərhədin dəqiq haradan keçməsi isə delimitasiyanın nəticələrinə əsasən məlum olacaq. Hərçənd, düşmən bu addımı atmağı heç istəmir, ona görə ki, hələ də revanşa ümid bəsləyir.

Sentyabr ayında ermənilərin şərti sərhəddə törətdiyi təxribatın nəticələri bu xam xəyalların necə başa çatmasını açıq-aydın göstərdi. Yerevandakı Yerablur memorial panteonunda yüzlərlə yeni məzar, onlarca sısqa əsir, 50-yə yaxın postun, hərbi obyektin, ümumi dəyəri on milyonlarla, bəlkə də yüz milyonlarla dollara bərabər olan bahalı texnikanın itirilməsi. Ən təəccüblüsü odur ki, belə vəziyyət ilk dəfə yaranmayıb.

Gözlənildiyi kimi, muzdlu erməni lobbiçilər öz yuvalarından çıxıblar. Bəyanatlar, qətnamələr, tvitlər səpələndi. Acizlikləri üzündən vəhşiləşmiş, real müharibədən qaçıb xaricdəki rahat yerlərində gizlənmiş “şirlər” əllərinə gələn əşyaları müxtəlif ölkələrin paytaxtlarında Azərbaycan səfirliklərinin fasadlarına atır, təhqirlər yağdırırlar. Onlar hamısı Amerika və Avropa ölkələrində polisin himayəsi altında “kişiləşir”. Lakin onlar atəş xəttinə düşsələr bir anda rəşadətli döyüşçü keyfiyyətləri harasa yox olur. Azərbaycan Ordusu erməni provokasiyalarını yatırmağa başladığı ilk dəqiqələrdən belə olub. Onlar əllərini yuxarı qaldırır, ayaqları isə bədənlərini əsir düşməyə doğru aparır. Amma əvəzində Avropa paytaxtlarında və okeanın o tayında onlar hamısı “igidlərə” çevrilir.

Erməni revanşistlər müxtəlif məşhur (eləcə də heç kəsin tanımadığı) şəxslərdən bəyanatlar qoparmağa çalışır, bu bəyanatlarda Azərbaycanı “təcavüzkar” və “işğalçı” kimi qələmə verərək deyirlər ki, Qarabağ artıq “mübahisəli” deyil, “mübahisəsiz” Ermənistan ərazisidir.

İcazənizlə bildirim ki, Qarabağ heç vaxt, hətta Bakı tərəfindən nəzarətin de-fakto tamamilə itirildiyi illərdə də mübahisəli ərazi olmayıb! Qarabağ de-yure mübahisəsiz Azərbaycan ərazisi olub və yenə belədir. O dövrdə bu ərazi işğal edilmişdi, bu gün isə burada Rusiya sülhməramlı kontingenti müvəqqəti yerləşdirilib. Onun orada qalma müddəti 2025-ci ildə başa çatacaq. Azərbaycan ərazisinin harada qurtarması və Ermənistan ərazisinin harada başlanması isə mübahisəli məsələdir və delimitasiya bu məsələni aydınlaşdırmağa kömək edəcək. Delimitasiyanın başlanmasını hər vasitə ilə uzadan Ermənistandır. Cənablar, “işğal” barədə danışmaq üçün əvvəlcə sərhədin haradan keçdiyini müəyyən etmək lazımdır. Onda məlum olacaq ki, kim haradadır və kim kimi “işğal” edir.

İkincisi, bu gün Ermənistanın işğalçı kimi qalması göz qabağındadır. O, şübhəsiz Azərbaycan ərazisi olan Azərbaycan anklavlarını hələ də nəzarət altında saxlayır. Bundan əlavə, erməni silahlı qüvvələrinin qalıqları 2020-ci il 10 noyabr tarixli üçtərəfli Bəyanatın dördüncü bəndini pozmaqla Azərbaycanın şübhəsiz ərazisi olan Qarabağ ərazisində hələ də qalmaqdadır. Azərbaycan Ordusunun sərəncamında bunu təsdiq edən təkzibolunmaz sübutlar var.

Üçüncüsü, Ermənistanda nəinki səngiməyən, hətta güclənməkdə olan revanşist əhval-ruhiyyə şəraitində Azərbaycan Silahlı Qüvvələri dövlət sərhədlərinin təhlükəsizliyinin təmin edilməsi üzrə bütün preventiv tədbirləri həyata keçirməyə sadəcə borcludur. Dünyada dövlət sərhədlərinin ipə-sapa yatmayan qonşular tərəfindən təhlükə gözlənilən sahələrində dövlətlərin təhlükəsizlik zonaları yaratmasına aid başqa nümunələr az deyil. Hər halda 5-6 belə nümunə göstərmək olar. Bu gün Azərbaycanı tənqid edənlərdən kim həmin keyslərin ünvanına qınaq sözləri söyləyib? Əksinə, bu və ya digər dövlətin öz təhlükəsizliyini təmin etmək üçün legitim hüququnu bəyənən, anlayan və dəstəkləyən səslər çox tez-tez eşidilir. Belə olan təqdirdə bugünkü tənqidçilərdən xahiş edirik, əgər onların sponsorları Azərbaycanın eyni legitim hüququnu dəstəkləyən çıxışlar etməyə icazə vermirlərsə, barı bizim xalqla bağlı halda da sussunlar.

Düşmən sülh müqaviləsini imzalamağı uzadır, delimitasiyaya razılaşmır, qüvvə toplayır və “tezliklə qisas alacağı” barədə car çəkməkdən yorulmur.

Belə olan halda biz nə etməliyik, əlimizi yanımıza salıb gözləməliyikmi?! Əgər bizi tənqid edənlər özləri bizim yerimizdə olsaydılar, onlar necə hərəkət edərdilər?

Sərhədin tezliklə delimitasiya edilməsinin, ərazi bütövlüyünün qarşılıqlı tanınmasının, ərazi iddialarından imtina etməyin və kommunikasiyaların açılmasının zəruri olması barədə yorulmadan danışan Ermənistan deyil, Azərbaycandır. Muzdlu qışqırıqçılar isə “işğalçılıqda” nədənsə bizi ittiham edir, Ermənistanın Azərbaycan anklavlarını işğal etməsini və öz hərbçilərini Azərbaycanın Qarabağ bölgəsində saxlamasını sanki görmürlər. Məgər bu absurd deyilmi?!

Azərbaycan öz təhlükəsizliyini təmin etmək niyyətini və uzunmüddətli sülhə tərəfdar olduğunu qətiyyətlə bəyan edir. Bizi heç kəs bu yoldan döndərə bilməz!

Azərbaycan Prezidenti işğaldan azad edilmiş Laçında çıxışında bütün dünyaya artıq neçənci dəfə bəyan etdi ki, bizə təzyiq göstərməyin mənası yoxdur. Bizim öz nəcib məqsədimizə doğru irəliləməyimizə dünyada heç kəs mane ola bilməz, çünki haqq-ədalət bizim tərəfimizdədir. Daha sonra, Yerevanda illüziyalardan əl çəkməli və şübhə etməməlidirlər ki:

• Azərbaycanın təklif etdiyi şərtlər daxilində sülh müqaviləsi BAĞLANACAQ;

• Ermənistan Azərbaycana ərazi iddialarından açıq-aşkar imtina etməli OLACAQ, bu isə rəsmən “Qarabağ Azərbaycandır!” deməyə bərabərdir;

• Ermənistan Qarabağda məhv edilməmiş əsgərlərinin qalan hissəsini oradan çıxarmalı OLACAQ;

• Naxçıvan ilə Azərbaycanın Şərqi Zəngəzur iqtisadi rayonu arasında maneəsiz dəmir yolu və avtomobil əlaqəsi yuxarıda adını çəkdiyimiz üçtərəfli Bəyanatın 9-cu bəndinə tam müvafiq şəkildə BƏRPA OLUNACAQ (bu marşrutu Ermənistanda istər “dəhliz”, istər “qeyri-dəhliz” adlandırmalarından asılı olmayaraq);

• Azərbaycan Prezidenti tərəfindən xatırladılan müxtəlif xəritələr əsasında sərhədin delimitasiyası OLACAQ!

Ermənistanın başqa variantı yoxdur. Bu ölkənin rəhbərliyində bu aksiomu nə qədər tez başa düşsələr, onun paytaxtında Yerablur panteonunun genişlənməsinə bir o qədər tezliklə son qoyular.

Ey qonşular, daşı ətəyinizdən tökmək vaxtıdır.