Azərbaycan-Pakistan parlamentlərarası münasibətlərinin inkişaf perspektivləri müzakirə olunub
İslamabad, 7 sentyabr, AZƏRTAC
Azərbaycanın Pakistandakı səfiri Əli Əlizadə bu ölkənin Senatının sədr müavini senator Səlim Mandivala ilə görüşüb.
Səfirlikdən AZƏRTAC-a bildirilib ki, görüşdə Azərbaycan-Pakistan parlamentlərarası sıx əlaqələrin məmnunluq doğurduğu vurğulanıb. Ölkələrimiz arasında dostluq və qardaşlıq münasibətlərinin möhkəmlənməsində parlamentlərin önəmli rolu qeyd olunub. Pakistan Senatının Azərbaycanın ərazi bütövlüyünü dəstəkləyən və təcavüzkar Ermənistanı qınayan qətnaməsi yüksək qiymətləndirilib.
Senator Səlim Mandivala Azərbaycanın Pakistan üçün qardaş ölkə olduğunu deyib, iqtisadi, ticari, hərbi-texniki, müdafiə, enerji, turizm sahələrində əməkdaşlığın daha da möhkəmləndirilməsinin, birbaşa aviareyslərin açılmasının, parlamentlərarası dostluq qruplarının əlaqələrinin daha da genişləndirilməsinin zəruriliyini ifadə edib.
Görüşdə, həmçinin ölkələrimiz arasında əlaqələrin daha da genişlənməsinə xidmət edəcək birgə layihələrin icra olunması və qarşılıqlı yüksək səviyyəli səfərlərin həyata keçirilməsi məsələləri ətrafında fikir mübadiləsi aparılıb.
Qulu Kəngərli
AZƏRTAC-ın xüsusi müxbiri
İslamabad
Bölmənin digər xəbərləri
