Azərbaycan Prezidenti güclü mövqelərimizin daha da möhkəmləndirilməsi istiqamətində qətiyyətli addımlar atmaqdadır
Bakı, 8 noyabr, AZƏRTAC
Hərbi Qələbəmizin siyasi komponentləri Azərbaycan Prezidenti İlham Əliyev tərəfindən hələ müharibədən neçə illər əvvəl formalaşdırılıb. Dünyanın ən mötəbər tribunalarından Azərbaycan Prezidenti ölkəmizin haqlı mövqeyini dünya ictimaiyyətinin diqqətinə çatdırıb və qəbul etdirib.
AZƏRTAC xəbər verir ki, bunu Milli Məclisin deputatı Elşad Mirbəşiroğlu söyləyib.
O bildirib ki, Azərbaycan Prezidenti, Müzəffər Ali Baş Komandan İlham Əliyev hər zaman qeyd edirdi ki, biz münaqişənin dinc vasitələrlə aradan qaldırılmasının tərəfdarıyıq. Lakin nəticəsiz danışıqları sonsuzluğa qədər də davam etdirmək fikrində deyilik. Danışıqlar nəticə verməsə, torpaqlarımızı hərbi yolla işğaldan azad edəcəyik. Təbii ki, Azərbaycan Prezidenti bu sözləri deyərkən həm də dövlətimizin potensialına, Ordumuzun gücünə inamını da ifadə etmiş olurdu. Amma rəsmi İrəvan Azərbaycan Prezidentinin mövqeyini düzgün qiymətləndirə bilmədi. Əksinə, ermənilər Azərbaycanın yeni torpaqlarını işğal edəcəklərini bəyan etdilər. Bu da Ermənistanın özünü tam cəzasızlıq şəraitində hiss etməsinin nəticəsi idi. Ona görə də Ali Baş Komandanın rəhbərliyi ilə Ordumuz düşmənin təxribatlarının qarşısını almaqla yanaşı, əks hücuma da keçdi. Qısa zamanda torpaqlarımızı erməni işğalından azad etdik. Vətən müharibəsi dövründə Azərbaycan Prezidenti, həmçinin özünün diplomatik bacarıq və gücünü də göstərdi.
“2020-ci ilin əvvəlində Münhen Təhlükəsizlik Konfransı çərçivəsində Azərbaycan Prezidenti haqlı mövqeyimizi arqumentləşdirilmiş şəkildə o qədər dəqiq əsaslandırdı ki, Ermənistanın baş naziri Qarabağın Azərbaycana aid olduğunu bildirdi. Son illər beynəlxalq ictimai şüurda formalaşan fikir əsasən münaqişənin tənzimlənməsinin yeganə yolunun Azərbaycanın ərazi bütövlüyünün təmin olunmasında görmələrindən ibarət idi. Bu, Prezident İlham Əliyevin 2020-ci ilin payızına qədər formalaşdırdığı beynəlxalq ictimai rəy idi. Ölkəmizin siyasi qələbəsi sonrakı mərhələdə hərbi qələbəmizin daha böyük olmasını təmin etdi. Nəticədə 44 günlük müharibədə bəzi istisnaları çıxmaqla heç bir dövlət tərəfindən Azərbaycana qarşı hansısa ciddi ittihamlar irəli sürülməsi istiqamətində hər hansı bir cəsarəti görmədik. Çünki Azərbaycan Prezidenti Qələbənin siyasi elementlərini böyük məharət və bacarıqla formalaşdırmışdı. Beləliklə, Vətən müharibəsində tarixi Qələbəmiz Azərbaycan Prezidentinin strateji baxış və iradəsinin tərənnümünü idi.
Müharibədə Azərbaycan hansı güc və potensiala malik olduğunu nümayiş etdirdi. Qırx dörd gün ərzində 30 illik işğalın nəticələrini aradan qaldırdıq. Ordumuz 44 gün ərzində dünyanın heç bir ordusunun edə bilməyəcəyini bacardı. Ermənistan kapitulyasıya aktına imza atdı. Bütün bunlar Ordumuzun şücaətinin nəticəsi, eyni zamanda, Azərbaycan Prezidentinin strateji baxışları, iradəsinin tərənnümü idi”, - deyə E.Mirbəşiroğlu qeyd edib.
Azərbaycan Prezidentinin bu dövrdə informasiya və diplomatiya meydanında da döyüşərək, davamlı olaraq Zəfər qazandığını vurğulayan deputat bildirib ki, dövlətimizin başçısı xarici jurnalistlərin ittihamedici suallarına məharətlə cavab verərək, onları susdurmağı bacardı. Bu da Prezidentimizin geniş ensiklopedik biliklərə malik olduğunu göstərdi.
“Ölkə rəhbərinin hazırkı strategiyası Xankəndi, Xocalı və digər ərazilərimizdə də suverenliyimizin tam təmin edilməsinə hesablanıb.
Vətən müharibəsindən sonra Azərbaycan öz potensialını, gücünü növbəti dəfə nümayiş etdirdi. İşğaldan azad edilmiş ərazilərdə böyük sürətlə tikinti və quruculuq işlərinə başladıq. Prezidentimiz göstərdi ki, o, xalqımızı tək müharibədə qələbəyə deyil, eyni zamanda, postmüharibə mərhələsinə də hazırlayıb. İşğaldan azad edilmiş ərazilərimizdə ən müasir tələblərə cavab verən infrastruktur quruculuğu, xüsusilə də nəqliyyat-kommunikasiya sisteminin yaradılması həyata keçirildi. Çəkilən 1000 kilometrdən artıq yol həm də hərbi və təhlükəsizlik təyinatlıdır. Azad edilmiş ərazilərimizdə effektiv məskunlaşmanın həyata keçirilməsi üçün təsirli tədbirlər həyata keçirilir", - deyə deputat bildirib.
Onun sözlərinə görə, bütün bunlarla yanaşı, Ermənistanı sülhə məcburetmə strategiyası da uğurla reallaşdırılmaqdadır. Hərbi qələbəmiz bizə davamlı olaraq diplomatik qələbələr də gətirməkdədir. Azərbaycan Prezidenti İlham Əliyev cərəyan edən prosesləri dəqiq qiymətləndirərək güclü mövqelərimizin daha da möhkəmləndirilməsi istiqamətində qətiyyətli addımlar atmaqdadır.
Bölmənin digər xəbərləri
