AZƏRBAYCAN PREZİDENTİ İLHAM ƏLİYEV UKRAYNANIN BAŞ NAZİRİ VİKTOR YANUKOVİÇİ QƏBUL ETMİŞDİR
Azərbaycan Prezidenti İlham Əliyev dekabrın 26-da Prezident sarayında Ukraynanın Baş naziri Viktor Yanukoviçi qəbul etmişdir.
Dövlətimizin başçısı qonağı salamlayaraq dedi:
- Gərgin iş cədvəlinə baxmayaraq, Sizi Yeni il ərəfəsində Bakıda görməyimə çox şadam. Artıq çoxdan apardığımız dialoqumuzu davam etdirmək çox xoş və dəyərlidir. Ümidvaram ki, ölkəmizə səfəriniz ikitərəfli münasibətlərin inkişafında yeni mərhələ olacaq, onlara dinamizm verəcək, iqtisadiyyatın bir çox sahələrini əhatə etməyə imkan yaradacaqdır. Düşünürəm ki, Baş nazirimizlə konstruktiv söhbətiniz oldu.
Ukrayna hökumətinin başçısı qəbula görə təşəkkür edərək dedi:
- Həmkarlarımızla - Azərbaycanın Baş naziri, nazirlərlə, sentyabrın 1-də Kiyevdə iclas keçirən dövlətlərarası komissiyanın nümayəndələri ilə görülmüş işlərə müəyyən yekun vurduq. Lakin indi dinamika çox sürətlidir və ötən dövr ərzində məsələlər yığılıb qalmışdır. Biz keçmişdə respublikalarımız arasında, xalqlarımız arasında münasibətlərdə əsası qoyulmuş köhnə ənənələri davam etdirməyə hazırıq. Biz Heydər Əliyeviçin xatirəsini əziz tuturuq. Çox çətin bir zamanda Azərbaycanın Ukrayna xalqına göstərdiyi yardımı xatırlayırıq. Bu, lap yaxınlarda, 1999-cu ildə, yaz tarla işləri, kənd təsərrüfatında növbəti mövsüm ərəfəsində Ukraynanın dizel yanacağından, əslində, məhrum olduğu vaxtda baş vermişdir. Kənd təsərrüfatı əməkçilərimiz, kənd sakinlərimiz o dövrü çox yaxşı xatırlayırlar. Onlar Ukraynaya necə yardım göstərildiyini yaxşı xatırlayırlar.
Ukraynanın Baş naziri təkcə ticarət-iqtisadi sahədə deyil, humanitar sahədə də ikitərəfli münasibətlərin yaxşı ənənələrindən danışarkən vurğuladı ki, nəinki xalqlarımızın dostluq münasibətlərinin tarixi köklərini xatırlamaq, həm də əməkdaşlığı davam etdirmək və möhkəmlətmək lazımdır. Viktor Yanukoviç dedi: “Biz növbəti dəfə bütöv bir təkliflər paketi ilə gəlmişik və Sizdən təkliflər almağa hazırıq”. O, Azərbaycan iqtisadiyyatının yüksək inkişaf sürətini qeyd etdi. Ukrayna hökumətinin başçısı bildirdi ki, “indi Azərbaycanın göstərdiyi dinamika dünyada ən yaxşı dinamikadır. İqtisadiyyatın belə sürətini saxlamaq heç də sadəcə rekord deyildir. Bu təcrübəni öyrənmək lazımdır”.
Prezident İlham Əliyev vurğuladı ki, Azərbaycan və Ukrayna həmişə çox səmimi, səmərəli, konstruktiv surətdə əməkdaşlıq edirlər. Sovet İttifaqının tərkibində olduqları dövrdə də Ukrayna ilə Azərbaycan arasında çox sıx münasibətlər, mədəni mübadilə olmuşdur, dostluq, mədəniyyət günləri keçirilirdi. Dövlətimizin başçısı dedi ki, biz bundan sonra da bütün istiqamətlərdə bir-birimizə kömək edəcək və bir-birimizi dəstəkləyəcəyik.
Bölmənin digər xəbərləri
