AZƏRBAYCAN PREZİDENTİ İLHAM ƏLİYEVİN FÜZULİ, BEYLƏQAN VƏ BİLƏSUVAR RAYONLARINA SƏFƏRİ
AZƏRTAC xəbər verir ki, Azərbaycan Prezidenti İlham Əliyev aprelin 18-də Füzuli, Beyləqan və Biləsuvar rayonlarında səfərdə olmuşdur. Əvvəlcə Füzuli rayonuna gələn dövlətimizin başçısı Horadiz şəhərində Heydər Əliyev muzeyində oldu. Prezident İlham Əliyev muzeyin rəmzi açılışını bildirən lenti kəsdi, ümummilli lider Heydər Əliyevin həyat və fəaliyyətini, hələ sovet dövründə Azərbaycana rəhbərlik etdiyi illərdə Füzuli rayonuna səfərlərini əks etdirən fotoşəkillərə baxdı, xatirə kitabına ürək sözlərini yazdı.
Sonra Prezident İlham Əliyev Horadiz şəhərindəki Heydər Əliyev parkına gələrək, ümummilli liderin abidəsi önünə gül dəstəsi qoydu.
Həmin gün Azərbaycan Prezidenti, Silahlı Qüvvələrin Ali baş komandanı İlham Əliyev Füzuli rayonunun ərazisində təmas xəttində “N” hərbi hissəsinin əsgər və zabitləri ilə görüşdü, hərbi xidmətdə fərqlənənlərə mükafatlar təqdim etdi.
Ali baş komandan təmas xəttində Ermənistan hərbi birləşmələrinin mövqelərini müşahidə etdi.
Dövlətimizin başçısına məlumat verildi ki, “Azəraqrartikinti” Açıq Səhmdar Cəmiyyətinin inşa etdiyi körpünün uzunluğu 24,1 metr, eni 9 metrdir.
Prezident İlham Əliyev körpünün açılışını bildirən rəmzi qırmızı lenti kəsdi.
Azərbaycan Prezidenti İlham Əliyev həmin gün Dövlət Neft Fondunun vəsaiti hesabına Füzuli rayonunda məcburi köçkünlər üçün qəsəbələrin salındığı əraziyə gəldi.
Dövlətqaçqınkomun sədri Əli Həsənov yeni qəsəbə barədə Prezidentə məlumat verərək bildirdi ki, burada yaşayış üçün bütün infrastruktur yaradılmışdır. Zobucuq adlanan ərazidə beş qəsəbə salınmışdır. Hər qəsəbədə 200 ev vardır. Burada təxminən 2,25 min hektar sahə minalardan tamamilə təmizlənmişdir.
Dövlətimizin başçısı burada orta məktəb binası ilə tanış oldu, açılış mərasiminə toplaşmış rayon ictimaiyyətinin nümayəndələri qarşısında nitq söylədi.
Azərbaycan Prezidenti məcburi köçkünləri yeni qəsəbələrin istifadəyə verilməsi münasibətilə təbrik edərək dedi ki, qısa müddətdə bu ərazidə minlərlə ev tikilib, minlərlə soydaşımız öz doğma torpaqlarına qayıtmışdır. Qaçqınların və məcburi köçkünlərin yaşayış səviyyəsinin yaxşılaşdırılması və məşğulluğunun artırılması üzrə Dövlət proqramı çox uğurla icra edilir. 2003-cü ildə prezident seçkiləri ərəfəsində söz vermişdim ki, növbəti beş ildə Azərbaycanda bir dənə də çadır şəhərciyi qalmayacaqdır. Biz bu məqsədə dörd il ərzində nail ola bilmişik. Artıq Azərbaycanda çadır şəhərciyi yoxdur. Bu illər ərzində on minlərlə soydaşımız yeni evlərə köçürülmüşlər. Bu siyasət 2000-ci illərin əvvəllərində ulu öndər Heydər Əliyev tərəfindən başlanmış, ilk qəsəbə 2003-cü ildə Biləsuvar rayonunda salınmışdı. İndiyə qədər isə 70 mindən çox insan yeni evlərə köçürülmüşdür və bu proses davam edir. Bütün bunlar ulu öndər Heydər Əliyevin təşəbbüsü ilə başlanmış və hazırda uğurla davam etdirilən neft strategiyasının bəhrəsidir. Bütün bu qəsəbələr Neft Fondunun hesabına tikilmişdir.
İndiyə qədər bu məqsədlər üçün bütün mənbələrdən - dövlət büdcəsindən, Dövlət Neft Şirkətinin və Dövlət Neft Fondunun hesabından 900 milyon dollardan çox vəsait xərclənmişdir. Növbəti illərdə biz bunu daha da artıracağıq. Azərbaycanın təbii sərvətləri Azərbaycan xalqının xidmətindədir.
Prezident İlham Əliyev dedi ki, mənim göstərişimlə Horadizə qaz xətti çəkilməsinə başlanmışdır və ilin sonuna qədər qaz təchizatının bərpa olunacağı gözlənilir.
Mən əminəm ki, biz bütün rayonları işğalçılardan azad edəndən sonra hər yerdə böyük quruculuq-abadlıq işləri gedəcək, bütün infrastruktur bərpa olunacaq, evlər, məktəblər tikiləcəkdir. Bu gün Füzuli rayonunun işğaldan azad edilmiş ərazilərində gedən proseslər deməyə əsas verir ki, biz buna daha da böyük miqyasda nail olacağıq. Bu gün səhər mən təmas xəttində əsgərlərlə, zabitlərlə görüşdüm. Bir daha gördüm ki, bizim ordumuz qarşıda duran bütün vəzifələri yerinə yetirməyə hazırdır və buna qadirdir. Ordu potensialımız, ildən-ilə artan hərbi xərclərimiz bizi məqsədə yaxınlaşdırır. Bu gün Azərbaycan ordusu həm peşəkarlıq, həm də ki, maddi-texniki bazası baxımından bölgədə ən güclü ordudur. Dövlətimizin başçısı Ermənistan-Azərbaycan, Dağlıq Qarabağ münaqişəsinin həlli məsələsindən də danışaraq vurğuladı ki, hələ ki, biz danışıqlar prosesində iştirak edirik ki, məsələnin sülh yolu ilə həllinə ümidimiz var. Ancaq hamı bilməlidir ki, danışıqlar əbədi aparıla bilməz. Münaqişə beynəlxalq hüququn normaları və prinsipləri əsasında həll edilməlidir. Azərbaycan bu məsələdə öz prinsipial mövqeyindən geri çəkilməyəcəkdir.
Əhalinin məşğulluğunu təmin etmək məqsədi ilə 5250 ailəyə torpaq payı verilmiş, 300-dən artıq kəndli-fermer təsərrüfatı yaradılmışdır. Üzümçülüyün inkişafı üçün 12500 hektara yaxın sahə ayrılmışdır. Bu, yaxın üç ildə həmin ərazidə 20 min nəfərə qədər adamın daimi iş yeri ilə təmin olunmasına imkan yaradacaqdır.
Azərbaycan Prezidenti İlham Əliyev daha sonra Füzuli rayonunda Tibb mərkəzinin və su elektrik stansiyasının təməlqoyma mərasimlərində iştirak etdi.
Dövlətimizin başçısı Füzuli rayonuna səfərinin sonunda erməni işğalçılarına qarşı döyüşlərdə şəhid olmuş qəhrəman oğulların xatirəsinə ucaldılmış abidəni ziyarət edərək, gül dəstəsi qoydu.
Prezident İlham Əliyev aprelin 18-də Füzuli rayonuna səfərini başa çatdırıb Beyləqana gəldi. Dövlətimizin başçısı Heydər Əliyev parkında ümummilli liderin abidəsi önünə gül qoydu, Beyləqan rayonuna təbii qaz verilməsi münasibətilə keçirilən mərasimdə nitq söylədi, Heydər Əliyev muzeyinin açılışında iştirak etdi.
Daha sonra Prezident İlham Əliyev Qarabağ müharibəsi əlilləri və şəhid ailələri üçün tikilmiş binada mənzil verilənlərə orderləri təqdim etdi, “CTS Aqro” MMC-nin pambıq emalı zavodu ilə tanış oldu.
Həmin gün Biləsuvar rayonuna gələn Azərbaycan Prezidenti Cəbrayıl rayonundan olan məcburi köçkünlər üçün salınmış qəsəbədəki Heydər Əliyev parkında, İskəndər Talıbov adına orta məktəbdə oldu.
Azərbaycan Prezidenti İlham Əliyev aprelin 18-də axşam Bakıya qayıtdı.
 |
 |
 |
 |
 |
 |
Bölmənin digər xəbərləri
