“AZƏRBAYCAN: QAFQAZIN MÜHÜM MƏRKƏZİ”
H.Tava bir tarixçi kimi çıxış edərək Azərbaycanın qədim mənbələrdə Atropaten adlandırıldığını, dilimizin türk dilinə yaxın olduğunu, XII əsrdə Azərbaycan mədəniyyətinin çiçəkləndiyini, İran-Rusiya müharibəsi zamanı 1828-ci ildə iki hissəyə parçalandığını, SSRİ-nin süqutundan sonra müstəqil dövlətə çevrildiyini, dünyanın tanınmış siyasi xadimlərindən biri olan təcrübəli dövlət başçısı Heydər Əliyevin rəhbərliyi altında Azərbaycanda dünyəvi dövlət qurulduğunu və ölkəmizin yeni inkişaf mərhələsinə qədəm qoyduğunu xatırlatmışdır.
Ermənistan-Azərbaycan və Dağlıq Qarabağ münaqişəsinə toxunmuş jurnalist Ermənistanın işğalçılıq siyasəti nəticəsində ərazilərimizin 20 faizinin zəbt edildyindən, bir milyondan artıq azərbaycanlının öz doğma torpaqlarından zorla çıxarıldığından, 14 ildən artıq qaçqın və məcburi köçkün həyatı sürməyə məcbur olmuş bu insanların ağır şəraitdə yaşadığından, dövlətimizin onlara hərtərəfli qayğı göstərdiyindən söhbət açmışdır.
Hələ ötən əsrlərdən azərbaycanlıları əzəli torpaqlarından zorla çıxararaq orada erməniləri yerləşdirməyə başlamış çar Rusiyasının apardığı gizli siyasət nəticəsində 1828 və 1920-ci illərdə 500 min erməninin Türkiyə və İrandan köçürülərək Azərbaycan ərazisində, xüsusilə Dağlıq Qarabağda məskunlaşdırdığını açıqlamış H.Tava XX əsrin əvvəllərində Bakıda çoxlu sayda erməninin yaşadığını, ərazilərimizdə yaşamalarına baxmayaraq ermənilərin xalqımıza qarşı dəfələrlə soyqırımı törətdiyini, Böyük Ermənistan imperiyası yaratmaq xülyasına düşmüş ermənilərin Dağlıq Qarabağ münaqişəsini qızışdıraraq Azərbaycanın tarixi ərazisini ondan qoparıb Ermənistana birləşdirmək istədiklərini bildirmişdir.
Azərbaycanın Qafqazın mühüm mərkəz olduğunu xüsusi nəzərə çarpdıran müxbir bunu son zamanlar ölkəmizin ictimai-siyasi həyatında baş verən ciddi dəyişikliklərlə əlaqələndirmişdir.
Müəllif Azərbaycanın iqtisadi qüdrətinin getdikcə yüksəldiyini, sosial bazasının durmadan möhkəmləndiyini, dünyanın inkişaf etmiş ölkələri ilə hərtərəfli əlaqələr yaradıldığını və beynəlxalq aləmdə imicinin artması sayəsində ölkəmizin Qafqazda xüsusi nüfuza malik olduğunu, bu bölgədə aparıcı bir dövlətə çevrildiyini, Cənubi Qafqaz ölkələri arasında mühüm rola malik olduğunu göstərmişdir. Azərbaycanın apardığı siyasi xətdə Bakı-Tbilisi-Ceyhan neft kəməri də əsas amillərdən biri kimi ön plana çəkilmişdir.
Jurnalda məqalə ilə yanaşı ümummilli liderimiz Heydər Əliyevin, Prezident İlham Əliyevin şəkilləri dərc edilmiş, paytaxtımızın ümumi görünüşü verilmişdir.
Azərbaycanın xəritəsində Dağlıq Qarabağ və ona bitişik 7 rayon işğal edilmiş ərazi kimi göstərilmişdir.
Bölmənin digər xəbərləri
