Azərbaycan Qiymətləndiricilər Cəmiyyəti növbəti hesabat-seçki konfransını keçirəcək
Bakı, 5 mart, AZƏRTAC
Azərbaycan Qiymətləndiricilər Cəmiyyəti martın 10-da növbəti konfransını keçirəcək. Bununla bağlı cəmiyyətin idarə heyətinin iclasında qərar qəbul edilib.
Cəmiyyətdən AZƏRTAC-a bildiriblər ki, idarə heyətinin iclasının əsas müzakirə mövzusu növbəti konfransın hazırlıqları ilə bağlı məsələlər olsa da, eyni zamanda, digər cari məsələlərə də toxunulub.
Tədbirdə Beynəlxalq Maliyyə Korporasiyası ilə ikitərəfli əməkdaşlığın inkişaf etdirilməsi, cəmiyyətə üzvlüyün vəziyyəti, xüsusilə də qiymətləndirmə fəaliyyətinin qanunvericilik təminatının möhkəmləndirilməsi, hüquqi-normativ sənədlərin hazırlanaraq müvafiq icra hakimiyyəti orqanlarına təqdim edilməsi müzakirə edilib.
İclasda ölkədə qiymətləndirmə fəaliyyətinin daha təkmilləşdirilməsi üçün qanunvericilik təminatının möhkəmləndirilməsi, hüquqi-normativ sənədlərin yenilənməsinin zəruriliyini cəmiyyətə və hökumətə çatdırmaq üçün konfransa müvafiq dövlət qurumlarının, daşınmaz əmlak bazarına aidiyyəti olan digər təşkilatların nümayəndələrinin dəvət edilməsi qərara alınıb.
Bölmənin digər xəbərləri
