AZƏRBAYCAN RESPUBLİKASI ALİ MƏHKƏMƏSİNİN PLENUMU OLMUŞDUR
Plenum “Xuliqanlıq işləri üzrə məhkəmə təcrübəsi haqqında” məsələ müzakirə etmişdir.
Ali Məhkəmənin sədri Plenum iclasını açaraq vurğulamışdır ki, respublikamızın 2000-ci il sentyabrın 1-dən qüvvədə olan yeni Cinayət Məcəlləsinin xuliqanlıq üstündə məsuliyyət nəzərdə tutan 221-ci maddəsi əvvəlki Cinayət Məcəlləsinin müvafiq maddəsindən əhəmiyyətli dərəcədə fərqlənir. Həmin maddəyə cinayətin yeni tövsifedici əlamətləri əlavə edilmişdir. Məsələn, sağlamlığa qəsdən ağır və az ağır zərər vurma cinayətlərinin xuliqanlıq niyyəti ilə törədilməsi Cinayət Məcəlləsinə ayrıca maddələrlə daxil edilmişdir.
Qanunvericilikdə olan yeniliklər, eləcə də xuliqanlıq cinayətinin obyektiv tərəfinin zəruri əlaməti olan fəal hərəkətlərin bir sıra başqa cinayətlərin də törədilməsinə səbəb olması, bu zaman cinayətlərin ideal və real məcmusunun yaranması, xuliqanlıq cinayətinin zahirən oxşar cinayətlərdən fərqləndirilməsinin zəruri olması və s. hallar məhkəmələrə xuliqanlıq işləri üzrə izahatlar verilməsini tələb edir.
Plenum qeyd etmişdir ki, respublika məhkəmələri bu qəbildən olan işlərə, əsasən, düzgün baxırlar, maddi və prosessual hüquq normalarını düzgün tətbiq edirlər. Lakin həmin sahədə nöqsanlar da vardır. Bu növ işlərə baxılarkən bəzən ciddi qanun pozuntularına da yol verilir.
Müzakirə olunan bu məsələ ilə əlaqədar Plenumda Ali Məhkəmənin hakimi Rafiq Məmmədov məruzə etmişdir.
Həmin məsələ ilə əlaqədar Ali Məhkəmənin Plenumunda ədliyyə naziri Fikrət Məmmədov, respublikanın baş prokuroru Zakir Qaralov, Apellyasiya Məhkəməsinin kollegiya sədri İlham Həsənov, Ağır Cinayətlərə Dair İşlər üzrə Respublika Məhkəməsi sədrinin müavini Əli Seyfəliyev, Xaçmaz Rayon Məhkəməsinin sədri İsmayıl Abdurahmanlı və Gəncə Şəhəri Kəpəz Rayon Məhkəməsinin sədri Həsən İsmayılov çıxış etmişlər.
Ali məhkəmənin sədri Südabə Həsənova müzakirəyə yekun vurmuşdur.
Bundan başqa, Plenum Azərbaycan Respublikasının cinayət, cinayət prosessual və inzibati xətalar məcəllələrinə, eləcə də Mülki-Prosessual Məcəlləsinə və “Məhkəmələr və hakimlər haqqında” Qanunun 107-ci və 109-cu maddələrinə əlavələr və dəyişikliklər edilməsi barədə qanunvericilik təşəbbüsü qaydasında Azərbaycan Respublikasının Milli Məclisinə təkliflər verilməsi barədə məsələləri də müzakirə etmişdir.
Ali Məhkəmənin hakimləri Müzəffər Ağazadə və Bağır Əsədov Plenumda bu məsələlər barədə məruzə etmişlər.
Plenumda Ali Məhkəmənin cinayət işləri və inzibati hüquq pozmalara dair işlər üzrə məhkəmə kollegiyasının 2003-cü ildə gördüyü işlər barədə həmin kollegiyanın sədri – Ali Məhkəmə sədrinin müavini Hacıbala Sadıqovun məlumatı dinlənilmişdir.
Ali Məhkəmənin Plenumunda həmin kollegiyanın fəaliyyəti ətraflı təhlil edilmiş və qeyd olunmuşdur ki, respublikada keçirilmiş məhkəmə-hüquq islahatlarından sonra adı çəkilən məhkəmə kollegiyası tərəfindən ədalət mühakiməsinin həyata keçirilməsi sahəsində xeyli iş görülmüşdür. Bununla yanaşı, həmin kollegiyanın işində nöqsanlar da vardır.
Həmçinin, Plenumda respublika baş prokurorunun əlavə kassasiya protestinə və vətəndaşların əlavə kassasiya şikayətlərinə əsasən konkret cinayət işlərinə və mülki işlərə də baxılmışdır.
Plenum müzakirə olunan məsələlər və işlər barədə müvafiq qərarlar qəbul etmişdir.
Plenumun işində ədliyyə naziri Fikrət Məmmədov, baş prokuror Zakir Qaralov, baş prokurorun müavini Eldar Nuriyev, Ali Məhkəmənin yanında Elmi Məsləhət Şurasının üzvləri və respublikanın bir sıra rayon və şəhər məhkəmələrinin hakimləri iştirak etmişlər.
Bölmənin digər xəbərləri
