AZƏRBAYCAN RESPUBLİKASI MİLLİ TƏHLÜKƏSİZLİK ORQANLARININ ŞƏXSİ HEYƏTİNƏ
Sizi Azərbaycanın təhlükəsizlik orqanlarının yaradılmasının 85-ci ildönümü münasibətilə səmimi qəlbdən təbrik edir, hər birinizə dövlətimizin suverenliyi, təhlükəsizliyinin təmin olunması və daha da qüdrətlənməsi naminə fəaliyyətinizdə uğurlar arzulayıram.
Azərbaycanın təhlükəsizlik orqanlarının şanlı tarixi 1919-cu il martın 28-də Azərbaycan Xalq Cümhuriyyətinin Hərbi Nazirliyinin Baş Qərargahı nəzdində Kəşfiyyat və əks-kəşfiyyat bölməsinin təşkili günündən başlanır. 85 il ərzində həmin orqanlar mürəkkəb, ziddiyyətli, eyni zamanda, uğurlu yol keçmişdir. Xalq Cümhuriyyəti zamanı Azərbaycanın təhlükəsizlik orqanları gənc müstəqil dövlətimizə xidmət etmişdir. Sonrakı 70 il ərzində Azərbaycanın təhlükəsizlik orqanları SSRİ-nin təhlükəsizlik orqanlarının tərkib hissəsi olaraq, onun siyasətini həyata keçirməklə məşğul olmuşdur. 1960-1970–ci illərdə Azərbaycanın təhlükəsizlik təşkilatında ümummilli liderimiz Heydər Əliyevin səyləri nəticəsində ciddi dəyişikliklər həyata keçirilmiş və əldə edilən ən böyük nailiyyət Azərbaycanın təhlükəsizlik təşkilatının milliləşdirilməsi olmuşdur.
Azərbaycan Respublikasının müstəqilliyi dövründə Azərbaycan dövlətinin qurucusu olan Heydər Əliyev milli maraqlara xidmət edən təhlükəsizlik orqanlarının bünövrəsini qoymuşdur. Azərbaycan Respublikası Milli Təhlükəsizlik Nazirliyinin xalqa, vətənə sadiq quruma çevrilməsi məhz ümummilli lider Heydər Əliyevin gündəlik qayğısı və rəhbərliyi sayəsində mümkün olmuşdur. Azərbaycan Respublikasının suverenliyinə, konstitusiya quruluşuna, digər həyati əhəmiyyətli maraqlarına qarşı xarici dövlətlərin xüsusi xidmət orqanlarının və ayrı-ayrı şəxslərin pozuculuq fəaliyyətinin qarşısının qətiyyətlə alınmasında təhlükəsizlik orqanları tərəfindən aparılan mübarizə getdikcə səmərəli, müntəzəm və sistemli xarakter almışdır.
Məhz bu dövrdə Ermənistan Respublikası və Dağlıq Qarabağ separatçıları tərəfindən Azərbaycan Respublikası əleyhinə terror-təxribat fəaliyyətinin qarşısı alınmış, beynəlxalq terrorçuluqla mübarizə sahəsində ciddi nailiyyətlər əldə edilmişdir. Xarici tərəfdaşlarla birgə terrorçuluğa qarşı səmərəli mübarizə aparan Azərbaycan Respublikasının Milli Təhlükəsizlik Nazirliyi ölkəmizin antiterror koalisiyasının fəal üzvlərindən birinə çevrilməsində əhəmiyyətli rol oynamış və bu gün də həmin istiqamətdə fəaliyyətini davam etdirir.
Milli təhlükəsizlik orqanları qarşısında Azərbaycanın dövlət müstəqilliyini qorumaq, onun təhlükəsizliyini və demokratik sabitliyi təmin etmək, terrorçuluğa qarşı mübarizə sahəsində fəaliyyəti daha da gücləndirmək, ölkəmizin iqtisadiyyatı üçün strateji əhəmiyyət daşıyan kommunikasiyaların mühafizəsinin təmin olunmasında iştirak etmək və digər milli maraqları qorumaq kimi mühüm vəzifələr durur.
Əminəm ki, Heydər Əliyev məktəbinin şanlı ənənələrini yaşadan və layiqincə davam etdirən Milli Təhlükəsizlik Nazirliyinin əməkdaşları qarşılarında duran vəzifələrin yerinə yetirilməsi üçün bütün səylərini səfərbər edəcək, Vətənimizə hədsiz sədaqət, vətənpərvərlik, böyük şəxsi cəsarət, iradə, dönməzlik, saf mənəviyyat nümayiş etdirəcəklər. Milli Təhlükəsizlik Nazirliyində işləmək, dövlətimizin təhlükəsizliyini təmin etmək peşəsinə sahib olmaq hər bir vətəndaş üçün böyük şərəf olmalıdır. Ümidvaram ki, milli təhlükəsizlik orqanlarının əməkdaşları öz məsuliyyətlərini dərindən dərk edəcək və onların üzərinə düşən vəzifələri layiqincə yerinə yetirəcəklər.
Sizi peşə bayramı münasibətilə bir daha təbrik edir, Azərbaycan Respublikasının müstəqilliyinin qorunması yolunda fədakar fəaliyyətinizdə uğurlar arzulayıram.
İlham Əliyev
Azərbaycan Respublikasının Prezidenti.
Bakı şəhəri, 25 mart 2004.
Bölmənin digər xəbərləri
