Azərbaycan–Serbiya münasibətlərinin möhkəm təməli əməkdaşlığın gələcəkdə də dinamik inkişafına zəmin yaradır ŞƏRH
Bakı, 20 fevral, AZƏRTAC
Azərbaycan–Serbiya münasibətləri çoxşaxəli xarakter daşıyır. Tərəflər müxtəlif sahələrdə dialoqu uzun müddətdir davam etdirirlər. Əlbəttə ki, əsas istiqamət enerji sahəsidir. Enerji sahəsində ikitərəfli əməkdaşlıq hər iki tərəf üçün olduqca önəmlidir və konkret faydalar verir.
Bu sözləri AZƏRTAC-a açıqlamasında politoloq İlqar Vəlizadə deyib.
O xatırladıb ki, ötən illərdə tərəflər əsasən Azərbaycan qazının Serbiya bazarına ixracı məsələsini müzakirə edirdilər və bu istiqamətdə müəyyən layihələr həyata keçirilirdi. Lakin son dövrlərdə tərəflər bununla kifayətlənməyərək, yeni layihələr üzərində işləməyə üstünlük verirlər. Daha geniş investisiya layihələrinin həyata keçirilməsi planlaşdırılır və səfər çərçivəsində əldə olunan razılaşmalar da bunu təsdiqləyir.
“Xüsusilə SOCAR-ın investisiyası əsasında Serbiyanın Niş şəhərində qazla işləyən yeni elektrik stansiyasının tikintisi ilə bağlı əldə olunmuş razılıq göstərir ki, tərəflər əməkdaşlıqda yeni mərhələyə qədəm qoyurlar. Bu stansiyanın əhəmiyyəti ondan ibarətdir ki, Azərbaycan qazı yalnız xammal kimi deyil, eyni zamanda, onun əsasında istehsal olunan elektrik enerjisi formasında Serbiya istehlakçılarına təqdim ediləcək. Beləliklə, Azərbaycan enerjisi Serbiyaya təkcə qaz şəklində deyil, həm də elektrik enerjisi şəklində daxil olacaq. Bu layihə müəyyən mənada pilot xarakter daşıyır. Əgər təcrübə uğurlu olarsa, Azərbaycan bu modeli digər Avropa ölkələrində, həmçinin Asiyada tətbiq edə bilər. Buna oxşar təcrübə də artıq mövcuddur. Məsələn, Suriya ərazisində Azərbaycan qazı Hələb şəhərində yerləşən elektrik stansiyasına ötürülür, orada emal olunur və elektrik enerjisi şəklində istehlakçılara təqdim edilir. Bu cür layihələr Azərbaycanın iqtisadi potensialını artırır, eyni zamanda, dost və tərəfdaş ölkələrə dəstək göstərməyə imkan yaradır”, - deyə politoloq vurğulayıb.
Digər sahələrdə də əməkdaşlıq perspektivləri barədə danışan İ.Vəlizadə qeyd edib ki, yol-nəqliyyat infrastrukturunun tikintisi, turizm, kənd təsərrüfatı, kənd təsərrüfatı məhsullarının emalı, neft-kimya sənayesi kimi istiqamətlərdə əməkdaşlığın genişləndirilməsi mümkündür. Xüsusilə son illərdə hərbi və hərbi-texniki sahədə əməkdaşlıqla bağlı intensiv danışıqlar aparılır və bu istiqamətdə inkişaf müşahidə olunur. Azərbaycan Prezidentinin Serbiyaya rəsmi səfəri məhz bu sahələrdə əlaqələrin daha da möhkəmləndirilməsinə təkan verəcək.
“Tərəflər, həmçinin beynəlxalq arenada bir-birini dəstəkləyirlər. Serbiya hər zaman Azərbaycanın ərazi bütövlüyünü dəstəklədiyini bəyan edib və Qarabağı ölkəmizin ayrılmaz hissəsi kimi tanıyıb. Eyni zamanda, Azərbaycan da Serbiyanın mövqeyini dəstəkləyir. Xüsusilə Aleksandar Vuçiç dəfələrlə vurğulayıb ki, Azərbaycan Prezidenti İlham Əliyevə inanır və onun siyasi fəaliyyətini yüksək qiymətləndirir. Azərbaycan təcrübəsi, xüsusilə ərazi bütövlüyünün təmin edilməsi istiqamətində atılmış addımlar Serbiya üçün maraq doğurur. Azərbaycan öz imkanları çərçivəsində Serbiyaya dəstək verir, bu, Serbiya rəhbərliyi və xalqı tərəfindən yüksək qiymətləndirilir. Bütün bunlar da Azərbaycan–Serbiya münasibətlərinin möhkəm təməl üzərində qurulduğunu göstərir. Bu təməl əməkdaşlığın gələcəkdə də davamlı və dinamik şəkildə inkişafına zəmin yaradır”, - deyə o diqqətə çatdırıb.
Bölmənin digər xəbərləri
