Azərbaycan Turizm İnstitutunun əməkdaşları Batumidə keçirilən seminarda iştirak etmişlər
Bakı, 5 dekabr (AZƏRTAC). Azərbaycan Turizm İnstitutunun (ATİ) magistratura, doktorantura və əlavə təhsil şöbəsinin müdiri, dosent Nəsirulla Nəsirli və beynəlxalq əlaqələr şöbəsinin mütəxəssisi Orxan Musa Gürcüstanın Batumi şəhərində keçirilən “Cənubi Qafqaz sərhədyanı ölkələrin turizmi” mövzusuna həsr olunan III əməli görüş-seminarın iştirakçısı olmuşlar.
ATİ-nin mətbuat xidmətindən AZƏRTAC-a bildirmişlər ki, ənənəvi olaraq hər il keçirilən tədbirində institutun əməkdaşları “Azərbaycanda inkişaf perspektivləri olan turizm növləri” haqqında məruzə və təkliflərlə çıxış etmişlər. Azərbaycanın turizm potensialı və turizm növləri, inkişaf perspektivləri, region ölkələri üçün müalicə turizmi, uşaq və gənclər turizmi kimi aktual problemlərin həlli yollarının elmi izahına əsaslanan təkliflər paketi seminar iştirakçıları tərəfindən maraqla qarşılanmışdır.
İki gün davam edən əməli seminar çərçivəsində ATİ-nin nümayəndələrinin region universitetləri, müvafiq ali təhsil müəssisələrinin inkişafı, bakalavr, magistr, doktorantura təhsili sahəsində əməkdaşlığın formaları, vahid elmi jurnal və web-saytın yaradılması, doktorantlar üçün təqaüdlərin, həmçinin yay məktəblərinin təşkili barədə irəli sürdükləri təkliflər geniş fikir mübadiləsinə səbəb olmuşdur.
Seminarın sonunda müvafiq ali təhsil, turizm nazirlik və agentliklərinin nümayəndələri arasında memorandum imzalanmış, növbəti görüş-seminarın İranda keçirilməsi qərara alınmışdır.
Bölmənin digər xəbərləri
