Azərbaycan Ukrayna Konqresinin təsis yığıncağı keçirilmişdir
Bakı, 13 fevral (AZƏRTAC). Bakı Slavyan Universitetində Azərbaycandakı Ukrayna diasporunun nümayəndələrinin, habelə Azərbaycan Respublikasının Ukrayna qurumları ilə fəaliyyətinin genişləndirilməsində fəal iştirak etmək arzusunda olduqlarını bildirən vətəndaşların təsis yığıncağı keçirilmişdir.
Tədbir iştirakçıları Azərbaycanda T.Q.Şevçenko adına Ukrayna icmasının vəziyyətini müzakirə edərək etiraf etmişlər ki, qurum Ukrayna və Azərbaycan prezidentləri tərəfindən elan edilmiş, ölkələrimiz arasında strateji tərəfdaşlığın dərinləşməsi və genişlənməsi çərçivəsində tədbirləri kifayət qədər fəal həyata keçirməmişdir. Bununla əlaqədar iştirakçılar, yeni təşkilatın - Azərbaycan Ukrayna Konqresinin (AUK) təsis edilməsi haqqında qərar qəbul etmiş və AUK-un I qurultayı keçirilənədək “Azel” şirkətinin prezidenti İqor Yakovenkonu qurumun sədri vəzifəsinin müvəqqəti icraçısı seçmişlər.
Tədbir iştirakçıları AUK-un işinə Azərbaycan ictimaiyyətinin geniş təbəqəsini - həm Ukrayna əsilli şəxsləri, həm də hər iki ölkənin prezidentlərinin xəttini dəstəkləyən, habelə Azərbaycan Respublikasında Ukrayna dili, mədəniyyəti və ənənələrinin inkişafına yönəlmiş məqsəd və vəzifələri bölüşən şəxsləri cəlb etmək arzusunda olduqlarını bildirmişlər.
AUK-nın birinci qurultayının təşkil edilməsi və keçirilməsi üçün işçi qrupu yaradılmışdır.
Bölmənin digər xəbərləri
