Azərbaycan üzgüçüsü Raman Saleh Tokio Paralimpiadasında ikinci medalını qazana bilməyib
Bakı, 29 avqust, AZƏRTAC
Azərbaycan üzgüçüsü Raman Saleh Tokio Paralimpiadasının finalında mübarizə aparıb.
AZƏRTAC xəbər verir ki, təmsilçimiz 50 metr məsafəyə sərbəst üsulla üzgüçülük yarışlarının təsnifat mərhələsində 23,98 saniyəlik nəticə ilə üçüncü olub və həlledici mərhələyə adlayıb. Finalda məsafəni 23,85 saniyəyə qət edən R.Saleh dördüncü olub.
Yarışın qalibi belaruslu İqor Boki olub. O, məsafəni 23,21 saniyəyə qət edib.
Qeyd edək ki, daha əvvəl R.Saleh 100 metr məsafəyə arxası üstə üzgüçülük yarışlarında qızıl medala sahib olub.
Azərbaycanın komandasının hesabında 8 qızıl və 2 bürünc medal var.
“Tokio-2020”də ölkəmizi idmanın 6 növündə 47 kateqoriya üzrə rekord sayda - 36 idmançı təmsil edir. Atletlərimizin 24-ü kişi və 12-si qadındır.
XVI Yay Paralimpiya Oyunları sentyabrın 5-dək davam edəcək.
Bölmənin digər xəbərləri
