Azərbaycan və Türk diasporlarının əməkdaşlığının gücləndirilməsinə dair məsələlər müzakirə olunub
Bakı, 9 fevral, AZƏRTAC
Azərbaycan Respublikası Diasporla İş üzrə Dövlət Komitəsi (DİDK) ilə Türkiyənin Xaricdə Yaşayan Türklər və Əqraba İcmalar İdarəsi (YTB) arasında birgə işçi qrupun ilk iclası keçirilib.
DİDK-nın mətbuat xidmətindən AZƏRTAC-a bildirilib ki, iclasda 2018-ci ilin noyabrında Ankarada Dövlət Komitəsi ilə YTB arasında əməkdaşlığa dair imzalanmış Memorandumdan irəli gələn məsələlər müzakirə olunub, təkliflər səsləndirilib və onların icrası ilə bağlı fikir mübadiləsi aparılıb.
Görüşdə Azərbaycan və Türk diasporlarının uzun illərdir əməkdaşlıq etdiyini deyən DİDK-nın aparat rəhbəri Daşqın Rəcəbli Dövlət Komitəsi ilə YTB-nin birgə fəaliyyəti nəticəsində bu işbirliyinin daha da güclənəcəyini vurğulayıb. Qeyd edib ki, bu, erməni yalanlarına qarşı mübarizə aparmaq məqsədilə beynəlxalq müstəvidə Azərbaycan və Türk cəmiyyətləri arasında əlaqələndirməni gücləndirəcək.
YTB-nin sədr müavini Abdulhadi Turus təmsil etdiyi qurumun gənclərlə iş təcrübəsindən, Türkiyədə təhsil alan əcnəbi və xaricdə oxuyan türk tələbələrin təqaüdlə təmin olunmasından, onların arasında əlaqənin qurulması işindən danışıb. O, həmçinin xaricdəki istedadlı türk gənclərə Türkiyə dövləti tərəfindən dəstək göstərildiyini, xaricdəki türklərə yaşadıqları ölkədə onların hüquq və azadlıqları ilə bağlı təlim proqramının həyata keçirildiyini qeyd edib. A.Turus bu və digər layihələr çərçivəsində Azərbaycan diasporu ilə əməkdaşlığın daha səmərəli olacağını deyib.
Görüşdə qondarma “erməni soyqırımı”, Xocalı faciəsi, Qarabağ həqiqətlərinin dünyaya çatdırılması istiqamətində birgə layihələr, Azərbaycan və Türk diasporlarının ayrı-seçkilik, irqçilik və islamofobiyaya qarşı birlikdə mübarizə aparmaq məqsədilə akademik səviyyədə fəaliyyət planının hazırlanması, ortaq mədəni dəyərləri qorumaq və sosial-iqtisadi səviyyəsini artırmaq məqsədilə müştərək mədəni, sosial, iqtisadi layihələrin həyata keçirilməsi müzakirə olunub.
İclasda bu ilin noyabrında Türkiyədə keçiriləcək Türk Diaspor Forumu çərçivəsində azərbaycanlı və türk iş adamlarının biznes forumunun təşkili, dünyadakı Azərbaycan və Türk icmalarının digər xalqların diasporu ilə əlaqələrinin gücləndirilməsi, bir sıra ölkələrdə yerli idarəetmə orqanlarına seçkilər zamanı ortaq namizədlərin müəyyənləşdirilməsi ilə bağlı konkret addımların atılması, xaricdəki azərbaycanlı və türk gənclərin forumunun keçirilməsi və s. barədə təkliflər səsləndirilib. Müzakirə olunan məsələlərlə bağlı işçi qrup tərəfindən yaxın vaxtlarda fəaliyyət planının hazırlanması və icrası ilə bağlı razılığa gəlinib.
Sonra qonaqlar DİDK-nın fəaliyyəti ilə yaxından tanış olmaq məqsədilə şöbələrdə əməkdaşlarla görüşüblər. Onlara hər bir şöbənin fəaliyyəti, gördüyü işlər haqqında məlumat verilib.
Sonda qonaqlara xatirə hədiyyələri təqdim edilib.
Qeyd edək ki, YTB nümayəndələri Türkdilli Dövlətlərin Əməkdaşlıq Şurasına (TDƏŞ - Türk Şurası) üzv dövlətlərin diaspor məsələlərinə məsul nazirlik və qurumları arasında təcrübə mübadiləsi proqramının açılışında və Türk Şurasının Təmas Qrupunun 5-ci iclasında iştirak etmək məqsədilə Bakıya gəlib.
Bölmənin digər xəbərləri
