Tokio, 25 may, AZƏRTAC

Azərbaycan Xalq Cümhuriyyətinin 100-cü ildönümü ilə əlaqədar ölkəmizin Yaponiyadakı səfirliyi tərəfindən Tokioda rəsmi qəbul təşkil edilib.

AZƏRTAC xəbər verir ki, qəbulda əsas qonaq qismində Yaponiya xarici işlər nazirinin parlament üzrə müavini İvao Horii, yüksək səviyyəli dövlət və hökumət rəsmiləri, deputatlar, ictimai-siyasi dairələrin nümayəndələri, aparıcı kütləvi informasiya vasitələrinin təmsilçiləri, şirkət rəhbərləri, diplomatik korpusun əməkdaşları və bu ölkədə yaşayan həmvətənlərimiz iştirak ediblər.

2020-ci ildə Tokioda keçiriləcək Olimpiya və Paralimpiya Oyunları Təşkilat Komitəsinin sədri, 2000-2001-ci illərdə Yaponiyanın Baş naziri olmuş, hazırda da Yaponiyanın siyasi arenasında yüksək nüfuza malik olan Yoşiro Mori də tədbirə qatılaraq öz təbriklərini çatdırıb.

Əvvəlcə Azərbaycanın və Yaponiyanın dövlət himnləri tanınmış yapon müğənni Kyoko Yamamotonun rəhbərlik etdiyi qrup tərəfindən canlı ifa edilib.

Çıxış edən Azərbaycanın Yaponiyadakı səfiri Gürsel İsmayılzadə 1918-1920-ci illərdə müsəlman dünyasında ilk parlament respublika modeli əsasında qurulmuş Azərbaycan Xalq Cümhuriyyəti (AXC) barədə ətraflı məlumat verib. Azərbaycan Prezidenti İlham Əliyev tərəfindən 2018-ci ilin ölkəmizdə “Azərbaycan Xalq Cümhuriyyəti İli” elan edildiyini və həm ölkəmizdə, həm də onun hüdudlarından kənarda bununla əlaqədar çoxsaylı tədbirlərin keçirildiyi qeyd edilib. Vurğulanıb ki, AXC müsəlman dünyası ilə yanaşı, bir çox Avropa dövlətlərindən də qabaq qadınlara səsvermə hüququ vermiş ilk dünyəvi müsəlman dövləti olub. AXC-nin yaranması Azərbaycan xalqının böyük nailiyyətidir, məhz o zaman Azərbaycan dili rəsmi status alıb, Azərbaycan bayrağı və digər dövlət atributları qəbul edilib, Azərbaycan Silahlı Qüvvələri yaradılıb. Həmçinin Azərbaycan özünü dünyada tanıtmaq üçün fəal xarici siyasət aparıb.

Sonra G.İsmayılzadə 1991-ci ildə Azərbaycanın müstəqilliyini bərpa etməsi, qarşıya çıxan çətinliklər barədə bəhs edib. Müasir Azərbaycanın Prezident İlham Əliyevin rəhbərliyi ilə dövlətçiliyin inkişafı yolunda inamla addımladığı, ölkədə davamlı siyasi-iqtisadi islahatların həyata keçirildiyi vurğulanıb. Səfir Prezident İlham Əliyevin apardığı məqsədyönlü siyasət nəticəsində ölkəmizin son illərdə qazandığı böyük uğurlar barədə ətraflı məlumat verib, o cümlədən iqtisadiyyat, xüsusilə qeyri-neft sektorunun inkişafı ilə bağlı həyata keçirilən və gələcəkdə nəzərdə tutulan müxtəlif layihələr barədə ətraflı danışıb.

Azərbaycanda keçirilən mötəbər beynəlxalq tədbirlər barədə məlumat verən səfir bu tədbirlərin, o cümlədən Formula 1 Azərbaycan Qran-Prisi, birinci Avropa Oyunları, dördüncü İslam Həmrəyliyi Oyunları və digər idman və musiqi yarışlarının ölkəmizdə yüksək səviyyədə təşkil edildiyini söyləyib və bununla bağlı Azərbaycanın Birinci vitse-prezidenti Mehriban xanım Əliyevanın əhəmiyyətli töhfələri haqqında qəbul iştirakçılarına məlumat verib.

Azərbaycan-Yaponiya ikitərəfli münasibətlərinə toxunan G.İsmayılzadə ötən dövrdə iki ölkə arasında yüksək səviyyəli qarşılıqlı səfərlərin həyata keçirildiyini qeyd edib. İki ölkə arasında münasibətlər, iqtisadi, o cümlədən enerji və qeyri-neft sektoru sahəsində əməkdaşlıq haqqında bəhs edib. Səfir, həmçinin qeyd edib ki, son illərdə Azərbaycan ilə Yaponiya arasında regionlararası əməkdaşlıq genişlənir və bu, ikitərəfli münasibətlərin inkişafına öz töhfələrini verməkdədir.

Yaponiya parlamentinin Nümayəndələr Palatasının üzvü, Azərbaycan-Yaponiya parlamentlərarası əlaqələr üzrə işçi qrupunun Yaponiya tərəfdən rəhbəri Akira Amari Azərbaycan Xalq Cümhuriyyətinin qurulmasının 100 illiyi münasibətilə Azərbaycan xalqını təbrik edib. Ölkələrimiz arasında münasibətlərin yüksək səviyyədə olduğunu vurğulayan A.Amari Azərbaycanın regionda Yaponiyanın ən etibarlı tərəfdaşı olduğunu bildirib. Azərbaycan-Yaponiya parlamentlərarası işçi qrupunun ümummilli lider Heydər Əliyevin 1998-ci ildə Yaponiyaya səfəri zamanı yarandığını xatırladan A.Amari bu gün iki ölkə arasında münasibətlərin davamlı inkişafından məmnunluğunu ifadə edib.

Prezident İlham Əliyevin rəhbərliyi altında ölkəmizin sürətlə inkişafı etdiyini vurğulayan A.Amari ona yenidən Azərbaycanın dövlət başçısı seçilməsi münasibətilə ən səmimi təbriklərini ünvanladığını bildirib.

Azərbaycan və Yaponiya arasında ikitərəfli münasibətlərin səfir Gürsel İsmayılzadənin fəaliyyəti dövründə daha da inkişaf etdiyini qeyd edən Yaponiya parlamentinin üzvü ona gələcək fəaliyyətində uğurlar arzulayıb, iki ölkə arasında hərtərəfli münasibətlərin inkişafı üçün bundan sonra da köməyini əsirgəməyəcəyini vəd edib.

Tədbirdə əsas qonaq qismində iştirak edən Yaponiya xarici işlər nazirinin parlament üzrə müavini İvao Horii Respublika Günü münasibətilə Azərbaycan xalqını təbrik edib. Nazir müavini Yaponiyanın Azərbaycan ilə münasibətlərə xüsusi önəm verdiyini bildirib və iki ölkə arasında əməkdaşlığın gücləndirilməsi üçün geniş perspektivlər olduğunu qeyd edib. İ.Horii Yaponiya xarici işlər naziri Taro Kononun Azərbaycan Xalq Cümhuriyyətinin qurulmasının 100-cü ildönümü münasibətilə təbrik məktubunu oxuyub.

Məktubda nazir T.Kono hazırda Yaponiyada olmaması səbəbindən tədbirdə şəxsən iştirak etmədiyinə görə təəssüfləndiyini bildirib, 28 May - Respublika Günü, Azərbaycan Xalq Cümhuriyyətinin qurulmasının 100 illiyi münasibətilə səmimi təbriklərini çatdırıb. Vurğulayıb ki, AXC-nin qurulması Azərbaycan xalqının böyük nailiyyəti kimi yüksək qiymətə layiqdir.

Nazir Yaponiyanın Azərbaycan ilə münasibətlərə yüksək əhəmiyyət verdiyini, ölkəmizin inkişafının və nailiyyətlərinin Yaponiyada böyük sevinc hissi ilə qarşılandığını bildirib.

Ötən ilin sentyabrında Azərbaycan-Yaponiya diplomatik münasibətlərinin 25 illiyinin qeyd olunduğunun xatırlandığı məktubda bununla bağlı Yaponiya xarici işlər nazirinin parlament işləri üzrə müavini Manabu Horiinin Azərbaycana səfəri, səfər çərçivəsində “Azəri-Çıraq-Günəşli” yataqlar blokunun istismarı barədə Sazişin uzadılması haqqında sənədin imzalanması mərasimində Yaponiya dövləti adından iştirakı da əksini tapıb.

Azərbaycan-Yaponiya ikitərəfli münasibətləri, xüsusən də enerji sahəsində əlaqələrin inkişafından Yaponiya tərəfinin məmnunluğunun bəhs edildiyi məktubda əməkdaşlığın genişlənməsində “Silk Way West” şirkətinin Azərbaycan və Yaponiya arasında birbaşa yükdaşıma uçuşlarını həyata keçirilməsinin töhfələri qeyd edilib.

Azərbaycan xalqına bir daha təbriklərini çatdıran T.Kono yaxın gələcəkdə Azərbaycana səfər etmək niyyətində olduğunu da bildirib.

Təntənəli tədbir Azərbaycan milli musiqisi nümunələrinin səslənməsi ilə və ziyafətlə başa çatıb.

Vüqar Ağayev

AZƏRTAC-ın xüsusi müxbiri

Tokio