Azərbaycanda əkin sahələri üzrə aqrar sığorta ödənişləri 70 faiz artıb
Bakı, 14 yanvar, AZƏRTAC
Azərbaycanda ən çox aqrar sığorta ödənişi edilən əkin sahələri açıqlanıb. Azərbaycanda dövlət dəstəyi ilə təqdim olunan sərfəli aqrar sığorta mexanizmindən faydalanan təsərrüfatların sayı və həyata keçirilən zərər ödənişləri sürətlə artmaqdadır.
Aqrar Sığorta Fondundan (ASF) AZƏRTAC-a bildirilib ki, 2025-ci il ərzində müxtəlif hadisələr səbəbindən zərərlə üzləşən fermer və təsərrüfatlara ümumilikdə 9,2 milyon manat sığorta ödənişi edilib. Bu 2024-cü ilin ödənişləri ilə müqayisədə 44 faiz, 2023-cü illə müqayisədə isə 2,1 dəfə çoxdur.
Xatırladaq ki, Aqrar Sığorta Fondu 2023-cü ildə 4,4 milyon manat, 2024-cü ildə isə 6,4 milyon manat sığorta ödənişi həyata keçirib.
2025-ci ildə əkin sahələrində baş verən hadisələr üzrə fermer və təsərrüfatlara 8,8 milyon manat sığorta ödəniş edilib. Bu 2024-cü illə müqayisədə 70 faiz, 2023-cü ildəki ödənişlərə nisbətən 2,5 dəfə artıqdır.
Ötən il Aqrar Sığorta Fondu tərəfindən heyvandarlıq təsərrüfatlarında baş vermiş zərərlər üzrə 394 min manat sığorta ödənişi edilib. 2025-ci ildə Aqrar Sığorta Fondu tərəfindən sığortalanan 41 bitki növündən 26-sı üzrə sığorta ödənişi həyata keçirilib. Ötən il buğda və arpa sahələri üzrə ümumilikdə 5 milyon 175 min manat sığorta ödənişi həyata keçirilib. Bu, 2024-cü illə müqayisədə 2 milyon manat və ya 63 faiz çoxdur. Pambıq sahələri üzrə ödənişlər isə 958 min manat təşkil edib ki, bu da 2024-cü illə müqayisədə 72 min manat və ya 8 faiz artıqdır. Taxıl bitkiləri və pambıqdan sonra ən çox aqrar sığorta ödənişləri şaftalı, qarğıdalı, badam, günəbaxan, tütün, alma, armud, üzüm v ərik bitkiləri üzrə həyata keçirilib.
Xatırladaq ki, Azərbaycanda aqrar sığorta mexanizmi dövlət dəstəyi ilə həyata keçirilir. Fermerlərə dəstək üçün sığorta haqqının 50 faizini dövlət özü ödəyir. Nəticədə fermerlər cüzi ödəniş etməklə əkin sahələrini sığortalayırlar.
Hazırda bütün ölkə ərazisində payızlıq taxıl əkinləri və meyvə bağlarının sığortalanması prosesi davam edir. Aqrar Sığorta Fondu fermer və təsərrüfat sahiblərini dövlətin dəstəyindən faydalanmağa və əkin sahələrini vaxtında sığortalamağa çağırır. Sığortalanma prosesini asanlaşdırmaq üçün isə fermerlərin sığorta ödənişini “AsanPay” sistemi vasitəsilə, mobil telefonla ödəməsi imkanı yaradılıb.
Aqrar sığortanın əhatə etdiyi məhsullarının sığorta şərtləri və tarifləri ilə Aqrar Sığorta Fondunun rəsmi internet səhifəsində “Bitkiçilik məhsulları” bölməsində ətraflı tanış olmaq, sığorta haqqını isə “Bitkiçilik kalkulyatoru” vasitəsilə hesablamaq mümkündür.
Əlavə məlumatları ASF-nin sosial şəbəkə hesablarını izləməklə və 1651 nömrəsi ilə əlaqə saxlamaqla əldə etmək olar.
Bölmənin digər xəbərləri
