Azərbaycanın BMT-yə üzv qəbul olunmasından 20 il ötür
Bakı, 2 mart (AZƏRTAC). Martın 2-də Azərbaycanın BMT-yə üzv qəbul edilməsinin 20 ili tamam olmuşdur. Ötən müddətdə qurumda əməkdaşlıq Azərbaycanın dünya birliyinə sıx inteqrasiyasına nail olmaq və ölkəmizin beynəlxalq imicini möhkəmləndirməklə bərabər, həm də Ermənistanın təcavüzkar siyasətini ifşa etməyə yaxşı imkan yaratmışdır. Gündən-günə inkişaf edən, demokratik dəyərlərə önəm verən Azərbaycan bu qurumda böyük nüfuz sahibinə çevrilmişdir.
1992-ci il martın 2-də BMT Baş Məclisinin 46-cı sessiyasında Azərbaycanın təşkilata üzv qəbul olunması haqqında qətnamə qəbul edilmişdir. Nyu-Yorkda - BMT-nin iqamətgahı qarşısında təşkilatın 181-ci üzvünün - Azərbaycanın bayrağı qaldırılmışdır. Mayın 6-da isə təşkilatda Azərbaycan nümayəndəliyi fəaliyyətə başlamışdır. BMT-yə üzvlük Azərbaycan dövlətinə öz müstəqilliyini möhkəmləndirmək, Ermənistanın hərbi təcavüzünə qarşı beynəlxalq qanunlardan daha səmərəli istifadə etmək imkanı yaratmışdır. Ermənistan-Azərbaycan, Dağlıq Qarabağ münaqişəsi, Ermənistanın Azərbaycana hərbi təcavüz edərək ərazilərini zor gücünə tutmasının yolverilməzliyi təşkilatda dəfələrlə qaldırılmışdır.
1993-cü ildə BMT Təhlükəsizlik Şurası Ermənistan-Azərbaycan, Dağlıq Qarabağ münaqişəsinə dair 822, 853, 874, 884 nömrəli qətnamələr qəbul etmişdir. Bu qətnamələr Azərbaycanın ərazi toxunulmazlığını yenidən təsdiq edərək dərhal atəşkəs elan olunması, hərbi əməliyyatlara son qoyulması, işğalçı qüvvələrin Azərbaycan ərazisindən qeyd-şərtsiz çıxarılması tələblərini irəli sürür.
1994-cü ilin sentyabrında BMT Baş Məclisinin 49-cu sessiyasında iştirak edən ulu öndər Heydər Əliyev yüksək tribunadan Azərbaycandakı vəziyyət, Ermənistanın təcavüzü barədə dünya ictimaiyyətinə geniş məlumat vermişdir. Bir il sonra BMT-nin 50 illik yubileyi ilə əlaqədar Baş Məclisin xüsusi təntənəli sessiyasında ulu öndər Heydər Əliyev Ermənistan-Azərbaycan, Dağlıq Qarabağ münaqişəsində Azərbaycanın mövqeyini açıqlayaraq, dünya ictimayyətini Ermənistanın təcavüzünün dayandırılması üçün tədbirlər görməyə çağırmışdır.
1998-ci ildə ümummilli lider Heydər Əliyevin Fərmanı ilə BMT-nin Dünya İnsan Hüquqları Bəyannaməsinin 50 illiyi Azərbaycanda yüksək səviyyədə qeyd edilmişdir. Həmin il ölkədə ölüm hökmü, mətbuat üzərindəki senzura ləğv olunmuşdur.
2004-cü ilin sentyabrında Baş Məclisin 59-cu sessiyasında iştirak edən Prezident İlham Əliyev Ermənistan-Azərbaycan, Dağlıq Qarabağ münaqişəsi ilə bağlı BMT TŞ-nin məlum dörd qətnaməsinin yerinə yetirilmədiyini xatırlatmışdır. Dövlətimizin başçısı BMT qərarlarının həyata keçirilməsi üçün səmərəli, təsirli mexanizmin əhəmiyyətini qeyd etmişdir. Aparılan uğurlu diplomatiyanın nəticəsində ötən il martın 14-də BMT-nin Baş Məclisi “Azərbaycanın işğal edilmiş ərazilərində vəziyyət” barədə qətnamə qəbul etmişdir. Sənəd Azərbaycan Respublikasının beynəlxalq səviyyədə tanınan sərhədləri çərçivəsində ərazi bütövlüyünə dəstək verir, işğal olunmuş bütün ərazilərdən Ermənistan qüvvələrinin tam və qeyd-şərtsiz çıxarılmasını tələb edir və azərbaycanlı məcburi köçkünlərin öz yurdlarına qayıtması üçün müvafiq şəraitin yaradılmasını əks etdirir.
2006-cı ilin iyununda ölkəmizin BMT-nin İnsan Hüquqları Şurasına üzv qəbul edilməsi Azərbaycan-BMT əməkdaşlığında əlamətdar hadisə olmuşdur. Azərbaycan BMT-nin müxtəlif sahələr üzrə ixtisaslaşmış təşkilatları - İnkişaf Proqramı, Qaçqınlar üzrə Ali Komissarı, Uşaq Fondu, Elm, Təhsil və Mədəniyyət Təşkilatı, Sənaye İnkişaf Təşkilatı, Dünya Səhiyyə Təşkilatı, Qadınlar Fondu, Beynəlxalq Atom Enerjisi Agentliyi, Nüvə Sınaqlarının Hərtərəfli Qadağan olunması haqqında Müqavilə Təşkilatı ilə fəal əməkdaşlıq edir.
Azərbaycanın BMT çərçivəsində görülən işlərə verdiyi töhfələr sırasında qlobal səviyyədə terrorizmə qarşı aparılan mübarizədə ölkəmizin fəal iştirakı xüsusi qeyd edilməlidir. Bu mötəbər beynəlxalq təşkilatın vəzifəli şəxslərinin Azərbaycana səfərləri zamanı ölkəmizdə müxtəlif sahələrdə görülən işləri yüksək qiymətləndirməsi, Ermənistan-Azərbaycan, Dağlıq Qarabağ münaqişəsi ilə bağlı verdikləri bəyanatlar, ölkəmizin suverenliyini və ərazi bütövlüyünü dəstəkləmələri bir daha Azərbaycanın BMT-də güclü mövqeyini təsdiqləyir.
Keçən il dövlət müstəqilliyimizin bərpa edilməsinin 20-ci ildönümü ərəfəsində Azərbaycanın BMT Təhlükəsizlik Şurasına qeyri-daimi üzv seçilməsi ölkəmizin dünya dövlətlərinin yüksək etimadını və dəstəyini qazandığını bir daha təsdiqləmişdir. Bu seçim ölkəmizə iki dəfə BMT Təhlükəsizlik Şurasında sədrlik etmək imkanı yaradacaqdır. Azərbaycanın xarici siyasətinin təntənəsi olan bu hadisə bir daha sübut etmişdir ki, biz 20 ildə müstəqil ölkə kimi özümüzü dünyada təsdiqlətmişik. Azərbaycan sübut etmişdir ki, etibarlı tərəfdaşdır. Müstəqil siyasət aparan Azərbaycanın dünyadakı dostlarının sayı daim artmaqdadır. Dünya ölkələri Azərbaycana inanır, rəğbətlə yanaşır, dəstəkləyir və bütün sahələrdə əməkdaşlıqda maraqlıdır.
Bölmənin digər xəbərləri
