Azərbaycanın bugünkü inkişafının təməlində Ulu Öndərin müəllifi olduğu “Əsrin müqaviləsi” böyük rol oynayır
Yevlax, 29 sentyabr, AZƏRTAC
1994-cü il sentyabrın 20-də Bakıda dünyanın aparıcı neft şirkətləri ilə çağdaş tarixə “Əsrin müqaviləsi” kimi düşən qlobal neft müqaviləsi imzalandı. Bununla da Xəzər dənizi hövzəsində və bütün postsovet məkanında beynəlxalq əməkdaşlığın bünövrəsi, həmçinin ölkəmizin enerji təhlükəsizliyinin möhkəm təməli qoyuldu. Bu müqavilə Azərbaycanın inkişaf strategiyasının, uzunmüddətli tərəqqi konsepsiyasının başlanğıcı oldu.
AZƏRTAC-ın bölgə müxbiri xəbər verir ki, bu fikirlər Yevlaxda “Heydər Əliyev İli” çərçivəsində keçirilən “Əsrin müqaviləsi” tarixi Zəfərimizə gedən yolun başlanğıcıdır” mövzusunda tədbirdə səsləndirilib. Tədbir iştirakçıları əvvəlcə Mərkəzi Meydanda Ümummilli Lider Heydər Əliyevin abidəsini ziyarət edib, xatirəsinə hörmət və ehtiram əlaməti olaraq abidənin önünə gül dəstələri düzüblər.
Rayon icra hakimiyyətinin akt zalında davam etdirilən tədbirdə Ulu Öndər Heydər Əliyevin və torpaqlarımızın azadlığı uğrunda şəhid olmuş Vətən övladlarının xatirəsi bir dəqiqəlik sükutla yad edilib, Azərbaycanın Dövlət Himni səsləndirilib. Sonra Ümummilli Lider Heydər Əliyevin müəllifi olduğu neft strategiyasından və bu istiqamətdə həyata keçirilmiş müdrik siyasətindən bəhs edən videoçarx nümayiş olunub.
Tədbirdə çıxış edən Yevlax Şəhər İcra Hakimiyyətinin başçısı Anar Tağıyev bildirib ki, müasir Azərbaycanın otuz ildən artıq müddətdə dövlət quruculuğu, iqtisadi dirçəliş, ictimai-siyasi və sosial həyatında tərəqqi dövrünü əhatə edən bütöv bir dövr Ümummilli Lider Heydər Əliyevin adı ilə sıx bağlıdır. Azərbaycanın dövlət müstəqilliyinin möhkəmlənməsində və bugünkü inkişafının təməlində Ulu Öndərin müəllifi olduğu “Əsrin müqaviləsi” böyük rol oynayır. Ulu Öndər o dövrdə ölkəmizin gələcək inkişafını Qərb şirkətləri ilə milli maraqlara söykənən əməkdaşlığın qurulmasında görürdü və bir çox çətinliklərə baxmayaraq, qısa bir müddətdə bu möhtəşəm konsepsiyanı gerçəkləşdirməyə nail oldu. “Əsrin müqaviləsi” bütün dünyaya bir daha sübut etdi ki, bundan sonra təbii sərvətlərimizin əsl sahibi Azərbaycan xalqıdır.
Diqqətə çatdırılıb ki, “Əsrin müqaviləsi”nin uğurlu icrası nəticəsində Azərbaycanın neft-qaz ixracından əldə edilən gəlirlər sayəsində ölkəmiz inkişaf etdi, müasir ordu quruculuğu həyata keçirildi. Bu isə Prezident İlham Əliyevin rəhbərliyi ilə Azərbaycanın ərazi bütövlüyünün və suverenliyinin bərpası ilə nəticələnən Vətən müharibəsində əldə etdiyimiz tarixi Zəfərdə mühüm rol oynadı.
YAP Yevlax rayon təşkilatının sədri Rafiq Əliyev qeyd edib ki, 1994-cü ildə bağlanmış “Əsrin müqaviləsi” ölkəmizdə sabitliyi təmin etdi, Azərbaycanın hərtərəfli və sürətlə inkişaf etməsi üçün zəmin yaratdı. Bu qlobal layihə Azərbaycanın suveren dövlət kimi öz təbii sərvətlərinə sahib çıxmaq, milli mənafeyini, iqtisadi və strateji maraqlarını müdafiə etmək əzmini bütün dünyaya nümayiş etdirdi, dövlət müstəqilliyimizin mühüm təminatına çevrildi.
Tədbirdə digər çıxış edənlər də “Əsrin müqaviləsi”nin əhəmiyyətindən bəhs edib, Ulu Öndər Heydər Əliyevin müəllifi olduğu, Prezident İlham Əliyevin uğurla həyata keçirdiyi neft strategiyasının gələcəkdə də Azərbaycana böyük uğurlar qazandıracağını bildiriblər.
Sonda Ulu Öndər Heydər Əliyevin əziz xatirəsinə həsr olunmuş şeir təqdim olunub.
Bölmənin digər xəbərləri
