Azərbaycanın Ermənistanla sərhəddə buraxılış məntəqəsi qurması strateji əhəmiyyət daşıyır - türk siyasi şərhçi
Bakı, 26 aprel, AZƏRTAC
Azərbaycan dövlətinin Ermənistanla sərhəddə buraxılış-nəzarət məntəqəsi qurması və bu yoldan keçən avtomobilləri nəzarət altına götürməsi strateji əhəmiyyət daşıyır. Bu sərhəd-buraxılış məntəqəsinin açılması Azərbaycanın öz ərazi bütövlüyünü tam bərpa etməsi deməkdir.
Bu sözləri AZƏRTAC-a açıqlamasında Türkiyənin tanınmış jurnalisti, siyasi şərhçi Yakup Aslan deyib.
O bildirib ki, Ermənistanın təxribatları və dünya birliyini aldatmağa çalışaraq Qarabağın erməni əhalisinin guya blokada şəraitində qalması barədə yalan iddiaları özünü doğrultmadı.
Diqqətə çatdırılıb ki, Ermənistanın xahişi ilə bu ölkə sərhədlərinə Avropa İttifaqının (Aİ) müşahidəçi missiyası yerləşdirilib. Əgər Azərbaycan Qarabağdakı erməni əhalini blokada vəziyyətində saxlasaydı, onda bu barədə həmin müşahidəçilər Aİ rəhbərliyinə məlumat verərdilər. Belə bir məlumat yoxdur və bu fakt Ermənistanın yalan təbliğat apardığını, bu yolla Azərbaycana təzyiq edərək, ərazi bütövlüyünün bərpasına maneə olmağa çalışdığını göstərir.
Lakin Prezident İlham Əliyevin qətiyyəti nəticəsində əvvəlcə Laçın qan tökülmədən işğaldan azad edildi. Daha sonra isə Xankəndi-Laçın yolu Azərbaycan tərəfindən nəzarətə götürüldü ki, bu da rəsmi Bakının uğurlu hərbi-siyasi fəaliyyətinin nəticəsidir.
Yakup Aslan, həmçinin qeyd edib: “Azərbaycan beynəlxalq ictimaiyyətə sübut etdi ki, o, sülh istəyir və bu istiqamətdə ardıcıl addımlar atır. Bu addımlar bölgədə yaşayan ermənilərin də maraqlarını əks etdirir. Lakin buna baxmayaraq, Ermənistandakı bəzi siyasi dairələr xalqın deyil, böyük qüvvələrin maraqlarına uyğun siyasət apararaq təxribatlar törətməyə cəhd göstərirlər ki, sülh prosesi pozulsun. Azərbaycan belə təxribatlara məhəl qoymadan sülh istiqamətində səylərini davam etdirəcək. Regionda cərəyan edən proseslər onu deməyə əsas verir ki, Ermənistan məcburiyyət qarşısında qalaraq sülhə razı olacaq. Bunu şərtləndirən faktlardan biri Prezident İlham Əliyevin qətiyyətidir. Digər tərəfdən Azərbaycan Ordusunun qüdrətini və beynəlxalq aləmdəki nüfuzunu Ermənistanda şübhəsiz ki, nəzərə alırlar”.
Bölmənin digər xəbərləri
